Колледждерге академиялық еркіндік берілді

Колледждер жұмыс берушілердің талаптарына сәйкес келетін мамандарды даярлайтын болады

 

Техникалық және кәсіптік білім беру жүйесі неғұрлым икемді және білім алушылардың ең талап етілетін құзыреттерін қалыптастыруға бағдарланған болады. Қазақстандық колледждерге академиялық дербестік берілді. Енді олардың өздері жұмыс берушілермен бірлесіп, білім беру бағдарламаларының мазмұны мен оқу мерзімдерін айқындайтын болады, деп хабарлайды ҚР Білім және ғылым министрлігінің баспасөз қызметі.

Білім беру бағдарламалары студенттерге қажетті біліктіліктерді алуға және қысқа мерзімде жұмысқа орналасуға, ал қажет болған жағдайда қосымша басқа біліктіліктерді алуға мүмкіндік береді. Бұл шаралар өндірістегі технологиялық өзгерістерге және еңбек нарығының сұраныстарына бейімделуге мүмкіндік береді. Осылайша, колледждер жұмыс берушілердің талаптарына сәйкес келетін мамандарды даярлайтын болады.

«Бұдан басқа, енді дуалдық форматтағы оқу мерзімі студенттердің еңбек өтілі болып есептелетін болады. Бұл колледж түлектеріне жұмыс тәжірибесімен жұмысқа орналасуға мүмкіндік береді. Сонымен қатар колледждер студенттердің жасаған өнімдерін білім беру ұйымдарының шеберханаларында сата алады. Сондай-ақ мемлекеттік тапсырыс алу үшін колледждердің аккредиттеуден өтуі бойынша міндетті талап алынып тасталды», - делінген хабарламада.

Енді олар мемлекеттік тапсырысты орналастыруға лицензиясы болған және белгіленген талаптарға сәйкес келген жағдайда аккредиттеуден өтпей-ақ қатыса алады. Бұл ретте жастарды тегін техникалық және кәсіптік біліммен қамтуды одан әрі кеңейту жоспарланып отыр.

 
×
Бұл желілік ресурстың ақпараттық өнімдері 18 жастан асқан адамдарға арналған.