Инфляцияға себеп болып отырған базалық тауарлардың тапшылығын жоюға ерекше назар аударылады
Қазақстан Үкіметі импортқа тәуелділікті азайтып, ішкі нарықты отандық тауарлармен қамтамасыз ету үшін қаржылық қолдаудың жаңа тетіктерін іске қосады, деп хабарлайды Azattyq Rýhy.
Премьер-министрдің орынбасары – ұлттық экономика министрі Серік Жұманғариннің айтуынша, «Инвестицияға тапсырыс» тетігін енгізу және «Бәйтерек» холдингін 1 трлн теңгеге дейін капиталдандыру жоспарланып отыр.
Жалпы алғанда, экономиканың нақты секторын қолдауға шамамен 8 трлн теңге бағытталады.
«Ішкі нарықты отандық тауарлармен жүйелі түрде қамтамасыз ету үшін «Инвестицияға тапсырыс» бағдарламасы жүзеге асып жатыр. Бүгінде инфляциялық қысымның негізгі себептерінің бірі – тұтыну және тұтыну емес сегменттерде отандық өндірістегі бірқатар базалық тауардың тапшылығы. Біздің мақсат – ішкі нарықты отандық тауарлармен қамтамасыз ету және импортқа тәуелділікті төмендету», — деді Жұманғарин Үкімет отырысында.
Инфляцияның негізгі себептерінің бірі саналатын базалық тауарлар тапшылығын жоюға ерекше назар аударылады. Қазіргі таңда азық-түлік секторында 12 бағыт, ал азық-түлікке жатпайтын секторда 24 бағыт айқындалған.
2030 жылға дейін «Бәйтерек» холдингінің еншілес ұйымдары арқылы шамамен 100-120 млрд доллар көлемінде өнеркәсіптік жобаларды қаржыландыру жоспарланған.