Қазақстанда айына 85 мың теңге жалақы алатын адам жоқ – Ұлттық банк төрағасы
Ол бұл пікірін бүгін брифингте айтты
Қазақстанда ең төменгі жалақы, яғни, айына 85 мың теңге жалақы алатын адам жоқтың қасы. Бұл туралы бүгін Ұлттық банк төрағасы Тимур Сүлейменов мәлім етті, деп хабарлайды Azattyq Rýhy.
«Өздеріңіз түсінесіздер ғой, Қазақстанда 85 мың теңге деген жалақы кездеспейді десек болады. Бұл дегеніміз – статистикаға керек көрсеткіш ғой. Ал, орташа жалақы қазір 460 мың, медианды жалақы 300 мың шамасында. Сондықтан, ең төменгі жалақы мөлшері өскен соң елдегі жалақының бәрі өседі деген түсінік қате», - дейді Сүлейменов.
Ұлттық банк төрағасы ең төменгі жалақы азаматтардың табысын автоматты түрде көбейтетін құрал емес екенін, ал, жекеменшік компания жалақыны өндіріс артқанда ғана көбейтеді дейді ол.
«Біз жоспарлы экономикада өмір сүріп жатқан жоқпыз. Егер мемлекет ең төменгі жалақыны өсірсе, жекеменшік компаниялар да жалақыны көбейте салады деген сөз емес. Ондағы жалақы тек бизнестің табысына ғана байланып отыр», - деп түсіндірді Сүлейменов.
