Сарапшылар автокредитті бұқараға қатты таралған қызмет түрі деп бағалап отыр
2025 жылдың алғашқы алты айының қорытындысы бойынша елде сатылған көліктердің 59%-ы несиеге алынған, деп хабарлайды Azattyq Rýhy Қазақстан қаржыгерлер қауымдастығына (ҚҚҚ) сілтеме жасай отыр.
Аталған кезеңде банктер автонесиелерді 1,2 трлн теңгеге рәсімдеген. Бұл көрсеткіш өткен жылмен салыстырғанда 53%-ға жоғары. Халыққа берілген жаңа несиелер құрылымында автонесиенің үлесі 8,8%-дан 13,2%-ға дейін, ал банктердің жалпы несие портфелінде 12,2%-дан 15,4%-ға дейін өсті.
Автонесиеге берілген өтінімдер саны 2,9 млн-ға жетіп (+54%), орташа қарыз көлемі 6,7 млн теңгеге артқан.
Орташа мөлшерлеме 19,7%-дан 15,8%-ға төмендеген. Соның нәтижесінде, көлік бағасының 11%-ға өсуіне қарамастан, ай сайынғы орташа төлем 8%-ға азайып, 110 700 теңгені құрады. Сарапшылар мұны банктер мен автосалондар арасындағы бәсекенің күшеюімен түсіндіреді.