Қазақстан жобаға қауіп төнбеуі үшін заңдық тетіктерді қолдануға дайын
Ресейлік «Росатом» мемлекеттік корпорациясына халықаралық санкция салынбаған, ал Қазақстанда АЭС салу кезінде туындауы мүмкін қауіп-қатерлер шарттағы механизмдер арқылы ескерілген. Бұл туралы Қазақстанның Атом энергиясы жөніндегі агенттігі мәлімдеді, деп хабарлайды Azattyq Rýhy.
«Соңғы мәліметке сүйенсек, «Росатом» санкциялық тізімде жоқ. Егер болашақта жекелеген елдерде санкциялар күшейген жағдайда қандай да бір қауіп туындаса, бізде осыған қатысты шарттық механизмдер қарастырылған. Бұл механизмдерді қазақстандық компаниялар бұған дейін басқа жобаларда қолданған болатын. Мысалы, санкциялық ескертпелер мен басқа да құқықтық құралдарды қолдану мүмкіндігі бар», – деп атап өтті агенттік.
Сонымен қатар, әлеуметтік-гуманитарлық қажеттіліктер мен климаттық күн тәртібімен байланысты атом энергетикасы санкциялық тізімге енбеген, дейді ведомство.
Естеріңізге салайық, 14 маусымда Қазақстандағы алғашқы атом электр станциясын Росатом салатыны белгілі болды. Ал еліміздегі екінші АЭС-тің құрылысын жүргізетін консорциумды қытайлық компания басқарады.