Ұлттық қордан алынатын қаражаттың көлемі қысқарады
Биыл 7 айда ел экономикасы 2,7%-ға өсті. Ұлттық банк төрағасы Ерболат Досаев жыл қорытындысы бойынша Қазақстандағы жалпы ішкі өнім 3,7%-ға жетеді деген болжамын айтты.
«Ұлттық банктің бағалауынша, инфляция 2021 жылдың соңына таман 6-7% дәлізінде күтіледі. Биыл қыркүйекте ұсынылатын кезекті болжамды раундтың қорытындысы бойынша инфляцияны бағалау нақтыланады. Әлеуметтік-экономикалық дамудың 2022-2026 жылдарға арналған болжамына сәйкес, инфляцияны 2022 жылы 4-6%-ке дейін, 2023-2024 жылдары 4-5%-ке дейін, 2025-2026 жылдары 3-4%-ке дейін төмендетудің қажетті шарты болып табылады», - деді Ерболат Досаев Үкіме отырысында.
Бас банкирдің айутынша, тауарлар экспортының құны 2026 жылы 80 млрд АҚШ долларына дейін жетеді. Ал мұнай экспортының өсуі 2023 жылдың ортасынан бастап мұнай өндіру көлемінің ұлғаюымен қамтамасыз етілмек.
«Қаржы нарығын реттеу және дамыту агенттігі арасындағы 2021-2023 жылдарға арналған үш жақты келісім шеңберінде іске асырылатын импортқа тәуелділікті азайту жөніндегі шаралар 2026 жылы импорттың 43,4 млрд АҚШ долларына дейін қалыпты өсуіне ықпал ететін болады», - деді бас банкир.
Сондай-ақ, Ерболат Досаев Ұлттық қордан алынатын қаражаттың көлемі қысқаратындығын мәлімдеді.
«Ұлттық банкпен бұрын келісілген тәсілге сәйкес, Ұлттық қордан алынатын кепілдендірілген трансферттер 2022 жылы берілетін 2,4 трлн теңгеден 2024 жылы 2 трлн теңгеге дейін қысқарады. Жоғарыда айтылғандар негізінде 2022-2024 жылдарға арналған нысаналы трансферттердің көлемін Мемлекет басшысымен келісу қажет», - деді Ұлттық банк Төрағасы.
Әсел Оршыбекова, Нұр-Сұлтан