Оның бұл лауазымға тағайындалғанын Ғалым Ахмедьяров хабарлады
Қазақстанның еңбек сіңірген қайраткері Талғат Мұсабаев опера труппасының директоры лауазымына тағайындалды. Бұл туралы «Астана Опера» театрының директоры Ғалым Ахмедьяров мәлім етті, деп хабарлайды Azattyq Rýhy.
«Астана опера» театрының ресми сайты хабарлағандай, Талғат Мұсабаев – кәсіби тәжірибесі мол белгілі әнші, Құрманғазы атындағы Қазақ ұлттық консерваториясы мен осы жоғары оқу орнында аспирантураны тәмамдаған. Мұсабаев Италияда Мирелла Френи мен Паоло Кони сынды танымал коучтердің жетекшілігімен тағылымдамалардан өткен.
Ол талантымен Ресейдің Үлкен театры, Мариинский театры, Нью-Йорктегі Карнеги-холл мен Вашингтондағы Кеннеди орталығын қосқанда әлемнің ірі сахналарын мойындатқан.
«Театрдың опера труппасын басқару мен үшін үлкен абырой әрі жауапкершілік. Оның жоғары кәсібилігін сақтай отырып, көрермендерді жаңа қойылымдармен қуантуды жалғастыра беруі үшін бар күш-жігерімді саламын. Бізді алда көптеген қызықты жобалар күтеді», - деп атап өтті Талғат Мұсабаев.