Фестивальде әлемнің 8 елінен келген 21 үміткер өнер көрсетті
Ақтөбеде 9-14 тамыз күндері «Baqytty Bala-2022» халықаралық ашық балалар вокалдық фестиваль-байқауы болып өтті, деп хабарлайды Azattyq Ruhy.
Биыл фестивальге әлемнің 8 елінен келген 21 үміткер «Өнер орталығы» сахнасында екі кезең бойынша өнер көрсетті. «Бақытты баланың» әр жылғы Гран при иегерлері мен құрметті қонақтары өнер көрсеткен гала-концертте жас таланттар бағалы сыйлықтармен марапатталды.
Қазылар алқасының шешімімен, «Бақытты бала – 2022» фестивалінің жүлделі I орны (700 мың теңге) - Ақтөбе вокалисті Жанерке Әбдірахманова мен Барнауылдық Ульяна Зарваға (Ресей) бұйырды.
II орын және 500 мың теңге жүлдеге иегерлері:
1. Милан Пак, Өзбекстан,
2. Мелани Гарсье, Испания.
III орын және 250 мың теңге жүлде иегерлері:
1. Аяулым Сабыр, Ақтөбе,
2. Юлия Макс, Алматы,
3. Елен Бадалян, Армения,
4. Ялки Сака, Түркия.
Сондай-ақ, байқау қатысушылары дәстүр бойынша арнайы сыйлықтарға ие болды.
«Көрермен көзайымы» жүлдесін шымкенттік вокалист Сағын Өмірбайұлы алды (100 мың теңге).
Мәдениет қайраткері Қанат Айтбаевтың «Дәстүрге адалдық» арнайы жүлдесі мен 200 мың теңгені Қаскеленнен келген Шерхан Арыстан жеңіп алды.
ҚР Еңбек сіңірген қайраткері Светлана Айтбаеваның «Өнер қарлығашы» сыйлығымен Шымкенттік Еңлік Байзақ марапатталды.
«Дарын» мемлекеттік жастар сыйлығының лауреаты Рухия Байдукенованың 100 мың теңгелік арнайы «Үміт» жүлдесі Данияр Дүйсенбековке бұйырды.
«Хабар» агенттігінің музыкалық продюсері Жан Мұқановтың «Артистік шеберлік» арнайы жүлдесі мен 200 000 теңге польшалық вокалист Юлианна Китоваға бұйырды.
Дәстүр бойынша Димаш Құдайберген шығармашылығының жанкүйерлері де арнайы сыйлық дайындаған. Нұр-Сұлтан қаласының қатысушысы Ақжарқын Айдосова Dears атынан 170 мың теңге алды.
Сондай-ақ Гала-концертте кештің басты тосынсыйы - 2022 жылғы мерейтойлық балалар Евровидениесінде Қазақстанның атынан алматылық жас вокалист Давид Чарлин өнер көрсететін болды.