Асық ату ойыны ЮНЕСКО-ның мәдени мұралар тізіміне енді

Azattyq Rýhy

Сондай-ақ «Қазақ атбегілерінің көктемгі дәстүрлері» және Әзірбайжан, Қырғызстан, Түркиямен бірлескен «Қорқыт-Ата мұрасы» өтінімі қарастырылды

Асық ату ойыны ЮНЕСКО-ның мәдени мұралар тізіміне енді

Бүгін ЮНЕСКО-ның материалдық емес мұраны қорғау Үкіметтік емес комитетінің ХІІ сессиясы аясында «Қазақстың ұлттық ойыны – Асық ату» ЮНЕСКО-ның материалдық емес мұрасы ретінде танылып, тізімге кірді. Бұл туралы Baq.kz жазды. 

Қазақстан ЮНЕСКО-ның материалдық емес мұралардың репрезентативтік тізіміне «Қазақ атбегілерінің көктемгі дәстүрлері» және Әзірбайжан, Қырғызстан, Түркиямен бірлескен «Қорқыт-Ата мұрасы» өтінімін қарастырды.

Сессия аясында Қазақстанның арнайы көрме бұрышы көрсетіліп, асық ойыны баршаға паш етілді. Осы шара барысында, сессияға келген елдердің мүшелері асыққа ұқсас ойынның өздерінің де елдерінде бар екенін айтты. Осының негізінде, асық физикалық дайындықты дамытып қана қоймай, елдер арасындағы достықты нығайтатынын байқауға болады.

Халықаралық сарапшылардың айтуынша, өскелең ұрпақ аталған спортты сақтау мен дамытуда басты рөл атқарады.

Айта кетейік, номинацияға дайындықты ҚР ЮНЕСКО және ИСЕСКО істері жөніндегі Ұлттық комиссиясы, Материалдық емес мұраны қорғау жөніндегі Ұлттық комитеттің сарапшылары және ҚР Мәдениет және спорт министрлігі мен ҚР ЮНЕСКО жанындағы тұрақты өкілі жүргізді.

Қазақстан материалдық емес ұлттық мұраны қорғау жөніндегі конвенцияны ратификациялағаннан бері (2011 жыл, желтоқсан) ЮНЕСКО-ның материалдық емес мұралар репрезентативтік тізіміне ҚР қатысуымен 7 номинация ұсынылды: «Домбырада күй орындау» (2014 ж.), «Қазақ күресі» (2016 ж.), Қырғызстанмен бірлесе «Киіз үйді құру» номинациясы (2014 ж.) және «Айтыс/Айтыш өнері» (2015 ж.), сонымен қатар, «Наурыз» бойынша өтінім берген 12 мемлекеттің қатарына кірдік, «Бүркітпен аң аулау» (18 мемлекет), «Жұқа түрік наны» (5 мемлекет). Соңғы үшеуі тізімге 2016 жылы енді.

Қазақстандық өтінімнің ЮНЕСКО-ның халықаралық тізіміне енуі еліміздің материалдық емес мұраларының халықаралық дәрежеде танылуына және ұлттық деңгейде оны қорғаудың жүйелі шараларының жасалуына ықпал етеді.

 

×
Бұл желілік ресурстың ақпараттық өнімдері 18 жастан асқан адамдарға арналған.