Белгісіз әйел әйгілі әншінің үйіне оқ жаудырды

Америкалық танымал әнші Рианнаның Беверли-Хиллздегі зәулім үйіне 8 наурыз, жексенбі күні оқ атылған, деп хабарлайды Azattyq Rýhy Euronews-ке сілтеме жасап.

Белгісіз әйел әнші үйінде сүйіктісі A$AP Rocky және балаларымен бірге болған кезде үйге қарай оқ атқан.

Los Angeles Times басылымының мәліметінше, полиция оқиға орнына сағат 13:21-де келіп, 30 жастағы күдіктіні ұстаған. Полиция рациясындағы сөйлесулерге қарағанда, үй қақпасының алдына тоқтаған көліктен шамамен он рет оқ атылған. Кем дегенде бір оқ зәулім үйдің қабырғасын тесіп өткен.

Оқиға салдарынан зардап шеккендер жоқ. Тергеушілер шабуылдың себебін анықтауды жалғастырып жатыр.