Бұған дейін БАӘ ОПЕК пен ОПЕК+ құрамынан шыққан болатын
Біріккен Араб Әмірліктері 1 мамырдан бастап Мұнай экспорттаушы араб елдері ұйымынан (ОАПЕК) шығатынын мәлімдеді, деп хабарлайды Azattyq Rýhy.
Бұл туралы ұйымның баспасөз қызметі мәлімдеді.
X әлеуметтік желісінде жарияланған мәлімдемеде ОАПЕК Бас хатшылығы БАӘ-ге мұнай және энергетика саласындағы араб мемлекеттері арасындағы ынтымақтастықты дамытуға қосқан үлесі үшін алғыс білдірді.
ОАПЕК 1968 жылы құрылған. ОПЕК пен ОПЕК+ форматтарынан айырмашылығы, бұл ұйым мүше елдер арасындағы мұнай саласындағы экономикалық өзара іс-қимылды үйлестіруге бағытталған.
БАӘ шыққаннан кейін ОАПЕК құрамында 10 мемлекет қалады: Алжир, Бахрейн, Египет, Ирак, Кувейт, Ливия, Катар, Сауд Арабиясы, Сирия және Тунис.
Еске салайық, сәуір айының соңында Біріккен Араб Әмірліктері ОПЕК және ОПЕК+ форматтарынан шығатынын жариялаған еді.