Норвегиядағы АҚШ елшілігі маңындағы жарылыс теракт болуы мүмкін – полиция

Норвегиядағы АҚШ елшілігінің консулдық бөлімі кіреберісінде жексенбіге қараған түні жарылыс болды, деп хабарлайды Azattyq Rýhy DW басылымына сілтеме жасап.

Белгілі болғандай, адам шығыны жоқ, тек аздаған материалдық зиян келтірілген. Полиция бұл оқиға террорлық әрекет болуы мүмкін екенін айтады. 

Полиция жарылыстың нақты себептері туралы егжей-тегжейлі ақпарат берген жоқ. Тек «жарылғыш құрылғы» қолданылғанын ғана мәлімдеді.

AFP агенттігінің мәлімдеуінше, консулдық бөлім кіреберісіндегі қар үстінен әйнек сынықтарын көруге болады. Сондай-ақ қалың шыны есікте жарықтар пайда болған, сымдардан салбырап тұрған шамдар мен есік түбіндегі жерде қара іздер байқалған. Агенттік бұл іздер жарылыстың салдары болуы мүмкін екенін атап өтті.

АҚШ Мемлекеттік департаменті бұл оқиғаға қатысты әзірге түсініктеме берген жоқ.

Бұған дейін NRK телеарнасы полицияның мәлімдемесіне сүйене отырып, 8 наурыз күні жергілікті уақытпен шамамен 01:00-де (Қазақстан уақытымен 05:00) Норвегия астанасы Осло қаласындағы АҚШ елшілігінің кіреберісінде жарылыс болғанын хабарлаған еді. Жергілікті тұрғындар Reuters агенттігіне елшілік маңында қою түтін байқалғанын айтқан.

Полиция куәгерлерден жауап алып, күдіктілерді іздестіріп жатыр. Сондай-ақ оқиға орнын тексеру үшін арнайы иттер, дрондар мен тікұшақтар қолданылуда.

Әзірге ол жерден жергілікті тұрғындарға қауіп төндіруі мүмкін ештеңе табылған жоқ. Елшілік орналасқан көшеде көлік қозғалысы уақытша тоқтатылған.

DW басылымының жазуынша, Осло полициясы бұл ақпаратты қоғамдық телерадиокомпания NRK-ға растаған. Сонымен қатар құқық қорғау органдары оқиғаның басқа да себептерін қарастырып жатқанын мәлімдеді.

Полиция қылмысқа қатысы болуы мүмкін адамдарды іздестіріп жатыр, алайда әзірге «күдіктілер жоқ», деді баспасөз мәслихатында полиция бөлімшесінің басшысы Фроде Ларсен.