Оқиға бойынша тергеу жүріп жатыр
Алматыда ата-аналар кәмелетке толмаған қыздарына қатысты жыныстық сипаттағы қылмыс жасады деп күдіктенген таныс емес ер адамға байланысты полицияға жүгінген. Күдікті ұсталғаннан кейін өзіне қол жұмсамақ болған, деп хабарлайды Azattyq Rýhy қалалық полиция департаментіне сілтеме жасап.
Оқиға қаланың Алатау ауданында болған. Алматы қалалық полиция департаментінің мәліметінше, ата-аналардың арызына «Буран-127» патрульдік экипажы жедел әрекет еткен. Полицейлер қыздың жыныстық қолсұғылмаушылығына қарсы қылмыс жасады деген күдікке ілінген ер адамды ұстаған.
Ұсталғаннан кейін ер адам өзіне қол жұмсауға әрекет жасап, денесіне жарақат салған. Оқиға орнына жедел жәрдем шақыртылып, медицина қызметкерлері оған қажетті көмек көрсетті.
«Оқиғаға қатысты тергеу жүргізіліп жатыр. Құқық қорғау органдары болған жағдайдың барлық мән-жайын анықтап жатыр», – деп мәлімдеді департамент.
Зардап шеккен қыз бен күдіктінің жасы, сондай-ақ болжамды қылмыстың мән-жайы әзірге жарияланған жоқ.