Шавкат Рахмонов пен Белал Мұхаммед қайта кездесуі мүмкін

UFC 315 турнирінде Белал Мұхаммед Джек Делла Маддаленаға жеңіліп, титулдық кездесуден айырылған болатын. Енді жартылай орта салмақтағы чемпиондық белбеу үшін Ислам Махачев австралиялықпен жекпе-жекке шығуы ықтимал, деп хабарлайды Azattyq Rýhy.

UFC комментаторы Джон Эник Шавкат пен Белал арасындағы реванш жекпе-жегі қазан айына белгіленуі мүмкін екенін айтты.

«Егер Белал Мұхаммед UFC титулын үйіне қайтара алса жақсы болар еді, бірақ қазан айында Шавкат Рахмонов оған не ұсынатынын көреміз. Бұл жекпе-жек негізгі үміткерді анықтауы мүмкін».

Естеріңізге сала кетейік, бұл екі файтер 2023 жылдың желтоқсанында кездесуі керек болған, алайда Белал жарақат алып, октагонға шыға алмады. Сол кезде Рахмонов Иэн Гэрримен жекпе-жек өткізіп, төрешілер шешімімен жеңіске жеткен еді. Спорт сарапшылары мен жанкүйерлердің бір бөлігі Белал Мұхаммедтің қайтадан үміткерлер қатарына қосылуын қисынсыз деп бағалайды.

«Ол соңғы кездесуінде әлсіз болды. Оның Леон Эдвардспен болған жақсы нәтижесі – жай ғана сәттілік. Бұл – ереже емес, ерекшелік», – дейді сарапшылар.

Көпшілік пікірінше, Шавкатқа титул үшін күреспес бұрын рингке қайта оралып, тәжірибе жинау маңызды. Сондықтан Шон Брэди секілді қарсыласпен кездесу әлдеқайда қауіпті әрі қызықты болмақ.

«Неліктен көрерменге Белалдың тағы да жеңілуін көру қызықты болар еді? Шавкатқа қиын қарсылас керек – сонда жекпе-жек шын мәнінде көрерменге әсерлі болады», – делінген материалда.

UFC бұл жекпе-жекке рұқсат бере ме, жоқ па – оны алдағы уақыт көрсетеді. Бірақ жанкүйерлердің бір бөлігі Шавкаттың Белалмен емес, мықтырақ қарсыласпен жекпе-жек өткізгенін қалайды.