Ол әлем чемпионы атану үшін 9 жыл еңбек еткенін айтты
Сербия астанасы Белградта өтіп жатқан күрестен әлем чемпионатында еліміздің атынан тұңғыш рет алтын жүлде алып, топ жарған Ризабек Айтмұұан ендігі мақсаты Олимпиада ойындарында жеңіске жету екенін айтты, деп хабарлайды Azattyq Ruhy Спортты дамыту дирекциясына сілтеме жасап.
Ұлттық құрама спортшысы өзіне жеңістің оңайлықпен келмегенін атап өтті.
«Құттықтап жатқан қазақ еліне рақмет! Әлем чемпионы атану үшін 9 жыл еңбек еттім. Еңбегім ақталды. Бұл менің 92 келі салмақтағы соңғы жарысымның бірі. Келесі бәсекеден бастап Олимпиада бағдарламасына кіретін 97 кг дейінгі салмаққа ауысамын. Ендігі мақсатым – олимпия ойындарында медаль алу», - деді 19 жастағы атлет.
Еске салсақ, кеше еркін күрестен 92 кг дейінгі салмақтың финалында Ризабек əзербайжандық Осман Нурмагомедовпен күш сынасып, 5-2 есебімен жеңіске жеткен болатын.
Тақырыпқа орай: «Бұл – тарихи жеңіс»: Мемлекет басшысы Ризабек Айтмұқанды жеңісімен құттықтады
Осылайша, ол егемендік алғаннан бері әлем чемпионатында еркін күрестен алтын алған тұңғыш әрі ең жас қазақстандық палуан атанды. Осы уақытқа дейін Ұлттық құрама 17 жүлдеге қол жеткізген. Оның бесеуі – күміс, 12-і – қола медаль.