Әйгілі футболшы клубпен келісімшартқа 2025 жылдың 31 желтоқсанына дейін отырды
Аргентинаның ұлттық шабуылшысы Лионель Месси АҚШ-тың «Интер Майами» футбол клубының жанкүйерлеріне таныстырылды, деп хабарлайды Azattyq Ruhy.
36 жастағы әйгілі футболшыны көруге жиналған жанкүйерлер «Интер Майами» стадионын лық толтырды. Салтанатты іс-шараға клуб басшысы Дэвид Бекхэм және команданың бас жаттықтырушысы Херардо Мартино қатысты.
Лионель Месси ойынының тұсаукесер рәсімі Майамидегі ауа райының қолайсыздығына байланысты бір жарым сағатқа кеш басталды.
Айта кетерлігі, Аргентина құрамасының капитаны «Интер Майамимен» келісімшартқа 2025 жылдың 31 желтоқсанына дейін отырды. Ал оның жалақысы, бонустарды қоса есептегенде, бір маусымда 60 миллион долларға дейін жетеді. Лео жаңа клубта 10-нөмірімен өнер көрсетеді.
Лео Месси өткен жылғы әлем біріншілігінде турнирдің үздік ойыншысы деп танылған, ал Аргентина құрамасы болса чемпионат жеңімпазы атанған еді.
35-жастағы аргентиналық соңғы екі маусымда Францияның «Пари Сен-Жермен» клубында ойнаған. Команда сапында ел чемпионатын екі мәрте жеңіп алса, сол елдің суперкубогына қол жеткізді.
«Интер Майами» клубы АҚШ-тың MLS лигасында ойнайды. Клубқа Англия құрамасының экс-жартылай қорғаушысы Дэвид Бекхэм бірігіп қожалық етеді.
Енді ол америкалық клубтағы алғашқы матчын 21 шілдеде өткізуі мүмкін. Осы күні «Интер Майами» мексикалық «Крус Асуль» командасымен ойнайды.
Месси – «Алтын доп» сыйлығын 7 рет, «Алтын бутсы» премиясын 6 рет алған тарихтағы жалғыз футболшы.
Мессидің «Интер Майами» командасына өтуі футбол клубының танымалдығын арттырып, Instagram-да жазылушысы ең көп 5 клубтың қатарына кіргізді.
Қазір клубтың Instagram парақшасында 8 миллион жазылушы бар.
Естеріңізге сала кетейік, өткен маусымда ол 41 ойында 21 гол соғып, 20 нәтижелі пас берді. Аталған команда сапында 75 ойында 32 голдың авторы атанып, 35 нәтижелі пас шығарды.
Бақытжан Баймахан