ФИФА-ның Париж қаласындағы еуропалық кеңсесінде ФИФА Президенті Джанни Инфантино мен ҚФФ басшысы Әділет Барменқұлов арасында кездесу өтті
Кездесуде қазақстандық делегация еліміздегі бұқаралық футболды дамыту жобасын ұсынды. Жобада футболды насихаттау, дайындық және жарыс жүйелері, сонымен қатар футбол инфрақұрылымын жақсарту мәселелері де қамтылған. Бұл туралы Azattyq Ruhy Қазақстан футбол федерациясына сілтеме жасап хабарлайды.
Джанни Инфантино сол жобаларды жүзеге асыру үшін Қазақстан футбол федерациясына жан-жақты қолдау көрсетуге дайын екенін атап өтті. Сонымен қатар қазақстандық футбол мамандарына арналған білім беру процесін ұйымдастыруда ФИФА-ның техникалық командасы көмек көрсететінін жеткізді.
Тараптар ФИФА мен ҚФФ ынтымақтастығы аясында Қазақстан аумағында ФИФА іс-шараларын өткізу, сонымен қатар Орталық Азия футбол қауымдастықтарының өзара қарым-қатынасын жақсарту сұрақтарын талқылады.
Осы сұрақтарды әрі қарай талқылау мақсатында ФИФА басшысы Джанни Инфантино Қазақстан келуге дайын.
«ФИФА басшысымен маңызды кездесу өтті. Күн тәртібінде екі негізгі сұрақ қойылды. Балалар-жасөспірімдер және бұқаралық футболды дамыту. Біздің мақсатымыз әр қазақстандық үшін бұқаралық футболдың қолжетімді болуы, әуесқой футболшылардың санын ұлғайту және елімізде футболды дамыту үшін қолайлы жағдай жасау», - деді ҚФФ Президенті Әділет Барменқұлов.