Месси: «Барселонаға» оралып, өзім жақсы көретін клубқа үлес қосқым келеді»

Француздық "Пари Сен-Жермен" футболшысы Лионель Месси болашақта "Барселонаға" оралғысы келетінін жоққа шығармайды, деп хабарлайды Риа Новости.

"Алтын доптың" алты дүркін иегері Месси жазда келісімшартының аяқталуына байланысты "Барселонадан" кетіп, "2+1" схемасы бойынша "Пари Сен-Жермен" клубымен келісімшартқа отырған болатын.

"Әрқашан клубтың өсуіне көмектескім келетінін айтып жүрмін. Мен алдағы уақытта спорт директоры болғым келеді. Бұл «Барселонада» бола ма, жоқ па білмеймін. Мүмкін бұл басқаша болар. Егер осындай мүмкіндік туындап жатса, өзім жақсы көретін клубтың өрлеуі үшін қолымнан келгенше үлес қосқым келеді", - дейді Лионель Месси

Месси 2004 жылдан бері Барселонаның негізгі командасында ойнады.  Бұл клубпен бірге аргентиналық аяқдоп шебері он рет Испания чемпионатын және жеті рет ел Кубогын жеңіп алды, төрт рет Чемпиондар Лигасының жеңімпазы атанды.