Бес жыл ішінде 11 мың қазақстандықтың неден қайтыс болғаны белгілі болды

Қазақстанда өкпенің қатерлі ісігі — онкологиялық аурулардың ішінде ең қауіпті түрлерінің бірі болып қалып отыр. ҚР Денсаулық сақтау министрлігінің мәліметінше, бұл дерт сырқаттанушылық бойынша үшінші, ал өлім-жітім бойынша бірінші орынға шыққан, деп хабарлайды Azattyq Rýhy.

Ауру мен өлім-жітім көрсеткіштері

«Қазақстанда өкпе обыры онкологиялық аурулар арасында сырқаттанушылық бойынша үшінші орында, ал өлім-жітім бойынша – бірінші орында», – деп мәлімдеді ҚР Денсаулық сақтау министрлігі Медициналық көмекті ұйымдастыру департаменті директорының орынбасары Гүлнәр Жанғарашева.

2020–2025 жылдар аралығында ауру көрсеткіші мынадай болған:

• 2020 ж. – 100 мың тұрғынға шаққанда 17,9 (3 375 жағдай)
• 2021 ж. – 18,9 (3 615)
• 2022 ж. – 20,1 (3 925)
• 2023 ж. – 19,7 (3 873)
• 2024 ж. – 19,1 (3 833)
• 2025 ж. (қаңтар–сәуір) – 18,5 (1 252)

«Жыл сайын өкпе қатерлі ісігінен 2 мыңнан астам қазақстандық қайтыс болады. 2024 жылы аурумен тіркеліп, 5 жылдан астам уақыт өмір сүрген науқастардың үлесі 33,4%-ды құрады, бұл 2020 жылғы көрсеткішпен шамалас (33,2%). Өкпе обырының болжамы, әсіресе ауру кеш сатыда анықталғанда, әдетте қолайсыз. Бұл ерте диагностика мен алдын алу бағдарламаларының аса маңызды екенін көрсетеді», – деді Жанғарашева.