Қазақстанда алдымен қай қалалар 5G-ға қосылатыны белгілі болды

Жыл соңына дейін 685 ауыл, ал, 2020 жылға дейін тағы 509 ауыл интернетсіз отыратынына қарамастан, Асқар Жұмағалиев интернеттің әзірге ең жылдам желісі - 5G туралы әңгіме айтты. Министрлік Президенттен тапсырма алған соң, Қазақстанда 5G желісін енгізу жөніндегі Жол картасын бекіткен.

«5G мобильді байланысының тесттік сынағы Нұр-Сұлтан, Алматы және Шымкент қалаларында өтті.  5G технологиясын енгізу үшін тартылатын инвестициялар  көлемі үлкен болғандықтан, бұл технологияны алдымен республикалық маңызы бар қалаларда, яғни, Нұр-Сұлтан, Алматы, Шымкент қалаларында ұйымдастыру жоспарлануда», - дейді министр Асқар Жұмағалиев.

Жұмағалиевтің сөзіне сенсек, Нұр-Сұлтан халқы түгелдей 5G-ға қосыла қоймайды. Жоғары жылдамдықтағы интернет алдымен тек таңдаулы нысандарға тартылады.

«2021 жылдың аяғына дейін Нұр-Сұлтан қаласында Назарбаев университеті мен ЭКСПО қалашығы, ал 2022 жылы аэропорт пен вокзалдар, сауда орындары мен алаңдар 5G технологиясына тартылады.  Одан әрі 2023 жылдан бастап барлық облыс орталықтары», - дейді Асқар Жұмағалиев.

Бұл ретте, министрліктің баспасөз қызметі 5G желісін қосуға қанша инвестиция тартылғанын айта алмады. Инвестиция жеке компаниялардың қаржысы екені белгілі.

Кенжекей Тоқтамұрат, Нұр-Сұлтан