Депутат елімізге халықаралық ESG стандартын енгізу мәселесін көтерді

Мәжіліс депутаты, «AMANAT» партиясы фракциясының мүшесі Ерлан Әбдиев халықаралық ESG стандартын елімізде ұсыну керегін айтты, деп хабарлайды  Azattyq Rýhy.

«Баршамызға белгілі, 2022 жылғы Конституциялық реформа Қазақстан халқының жер қойнауы мен табиғи ресурстарға меншік құқығын бекітті. Құқықтық логика осы негізгі принципті экономикаға, әлеуметтік салаға, мемлекеттік және корпоративтік басқаруға, сондай-ақ пайдалы қазбаларды пайдалану саласына заңдар мен заңға бағынатын нормативтік-құқықтық актілер, сондай-ақ қазіргі заманғы есеп беру стандарттары түрінде одан әрі жүзеге асыруды талап етеді», - деді ол Мәжілістің жалпы отырысында.

Депутат өз сауалында атағандай, Конституциялық принципті жүзеге асыруда сапалы және тиімді шешімдердің бірі ретінде ESG стандартын пайдалы қазбаларды пайдалану саласына жүйелі түрде енгізу саналады.

«Қазақстан президенті 2023 жылғы 1 қыркүйектегі Қазақстан халқына арнаған жолдауында ESG принциптерінің маңыздылығын атап өтті. ESG стандарттары компания қызметінің қоршаған ортаға, қоғамға және ішкі басқару процестеріне әсерін бағалау мен басқаруға арналған критерийлер жүйесін ұсынады. ESG стандарттарын қолдану компанияларға өз репутациясын ғана емес, сонымен қатар бизнестің тұрақтылығын арттыруға, әсіресе тұрақты даму принциптерін қабылдайтын инвесторларды тартуға мүмкіндік береді. Жоғарыда айтылғандарды ескере отырып, Қазақстан ресурстарға негізделген экономика ретінде, корпоративтік басқаруда ESG стандарттарын енгізу мен белсенді қолдануды талап ететін мәселелермен бетпе-бет келіп отыр», - дейді ол.

Депутат заңнамада ESG есептілігі енгізілмегенін, ал бұл компаниялардың нәтижелерін бақылау және салыстыруды қиындататынын айтты.

«Халықаралық тәжірибеден айырмашылығы, Қазақстанда ESG саласындағы мәліметтерді дайындау мен ұсынуға арналған бірыңғай стандарттар жоқ. Осылайша, ESG стандарттарын тиімді интеграциялау үшін қолданыстағы көзқарастың фрагменттілігін жою, ESG стандарттарының бірыңғай жүйесін енгізу, сондай-ақ мемлекеттік ынталандыру мен бақылауды күшейту қажет», - дейді ол.

Жоғарыда айтылғандарға сүйене отырып, қазіргі мәселелерді ескеріп, төмендегі ұсыныстарды қарастыруды сұраймыз:

• ЕК елдеріндегі CSRD директивасы сияқты халықаралық тәжірибеге негізделген ұлттық ESG есептілігі стандарттарын әзірлеу.
• Стандарттарды енгізуді ынталандыратын шараларды бекіту, оған салық жеңілдіктері, жабдықтарды жаңартуға арналған субсидиялар және тұрақты даму жобалары, сондай-ақ экологиялық таза технологияларға көшу үшін арзан несиелеу кіруі тиіс.
• Компаниялардың тұрақты тәжірибелер бойынша қызметкерлерін оқытуды ұйымдастыру шараларын қабылдау және ESG компонентін жоғары оқу орындарының оқу бағдарламаларына енгізу.
• Транспаренттілікті қамтамасыз ету және бизнестің өз көрсеткіштерін жақсартуға ынталандыру мақсатында компаниялардың жария ESG рейтингін енгізу.