Оқушылар сабағын онлайн оқитын болды
Алматы облысының Талғар ауданында 4 балдық жер сілкінісіне байланысты мектептерде сабақ тоқтатылды, деп хабарлайды Azattyq Rýhy.
Бұл туралы Талғар ауданының білім бөлімі мәлімдеді.
«Бүгінгі жер сілкінісіне байланысты барлық білім беру ұйымында сабақ болмайды, оқушылар қашықтан оқиды», - деді білім бөліміндегілер.
Ал балабақшалар штатты режимде жұмыс істеп тұр, бірақ ата-аналар қаласа балаларын үйіне алып кете алады.
«Облыстың барлық білім беру мекемесімен төтенше жағдай, жер сілкінісі бойынша бірнеше рет оқу-жаттығу жүргізілген. Төтенше жағдай кезінде әр білім беру мекемесінің басшысы тиісті алгоритм бойынша әрекет жасады. Оқушылар мен ересектер (педагогтар, техникалық қызметкерлер) бірден сыртқа, қауіпсіз аймаққа шығарылды.
Еңбекшіқазақ ауданы бойынша Есік өңіріндегі 6 мектептің 6960 баласы және жақын ауылдардағы мектептер мен балабақшалардың балалары үйлеріне қайтарылды.
Талғар ауданында барлығы 42 мектеп бар. Соның ішінде Талғар қаласындағы 10 мектептің 12529 оқушысы және балабақша тәрбиеленушілері үйлеріне қайтарылды», - делінген Алматы облысының білім басқармасы таратқан хабарламада.
Естеріңізге салайық, 5 қарашада жергілікті уақытпен сағат 10:00-де Алматы қаласынан шығысқа қарай 33 шақырым қашықтықта жер сілкінісі тіркелді. Алматы тұрғындары 3 балдық жер сілкінісін сезсе, Талғар мен Есік қалаларында 4 балға жеткен. Ал басқа ауылдарда 2-3 балл сезілді.