Көпбалалы ана қызына болашақтың энергиясы тақырыбында киім кигізген
Тайтөбе ауылының тұрғыны Гүлжаһан Серікқызы референдум учаскесіне ерекше көтеріңкі көңіл сыйлады. Ол қызына болашақтың энергиясы үлгісінде арнайы киім кигізіп әкелген, деп Azattyq Rýhy.
Болашақтың энергиясы үлгісінде арнайы киім киген кішкентай қыздың есімі – Нұрай Талғатқызы. Көпбалалы ана Гүлжаһан Серікқызы референдумға қызына арнайы киім кигізгенімнің өз мәні бар дейді.
«Негізі осы киімді жуырда қаламызда «Бала өмірдің - гүлі» деген байқауға қатысқан кезде тіктіргенбіз. Қызымның үстіне киген костюм болашақтың энергиясын бейнелейді. Бүгінгі референдум тақырыбына сәйкес келіп тұрғандықтан, оны қайта кигізіп, референдум учаскесіне ала келдім. Бала біздің болашағымыз, келешегіміз десек, бүгін ел бойынша өтіп жатқан референдум да біздің болашағымыз. Жалпы, референдум біздің балалардымыздың болашағы үшін аса маңызды деп ойлаймын. Сондықтан да мен референдумға қызымды ертіп келдім», - дейді Гүлжаһан Серікқызы.
Айта кетейік, Қосшы қаласында бүгін таңғы сағат 7:00-ден бастап 12 референдум учаскесі жұмысын бастады. Референдумның алғашқы қатысушылары учаскелер ашылған сәттен бастап келді. Ең алғашқы қатысушыларға комиссия мүшелері сыйлықтар табыстады. Референдумға ағы буын және жастар өте белсенді қатысуда.
Референдум тәртібіне сай қаланың әрбір тұрғыны жеке дауыс береді. Бюллетень алу үшін өзіңізбен бірге жеке куәлік болуы қажет. Дауыс беру республикалық референдумға қатысу құқығы бар азаматтардың тізіміне сәйкес жүреді. Бұл тізімдер учаске аумағындағы тұрғылықты мекенжай бойынша тіркелген азаматтар негізінде әкімдіктер арқылы жасалған. Оған 18 жасқа толған, әрекетке қабілетті, сот үкімі бойынша бас бостандығынан айыру орындарында отырмаған Қазақстан азаматтары енді.