Сотқа дейінгі тергеу жүріп жатыр
Атырауда блогерлердің ауыр сөздерінен кейін қан қысымы көтеріліп, көп ұзамай көз жұмған «Мемлекеттік сараптама орталығы» күзетшісінің өліміне байланысты полиция бұзақылық бабымен қылмыстық іс қозғады, деп хабарлайды Azattyq Rýhy.
«Осы факті бойынша қылмыстық іс қозғалды, сотқа дейінгі тергеу жүріп жатыр. Басқа ақпарат тергеу мүддесіне байланысты жария етілмейді», - деді Атырау облысының полиция департаменті.
Іс Қылмыстық кодекстің 293-бабы 2-тармағы «Бұзақылық» бойынша қозғалған.
Айта кетері, бұл баптың санкциясы – 3 мыңнан 7 мың АЕК-ке дейiн айыппұл не сол мөлшерде түзеу жұмыстары, не 1200 сағатқа дейін қоғамдық жұмыстарға тарту, не 3 жылдан 6 жылға дейiн бас бостандығын шектеу не сол мерзiмге бас бостандығынан айыру.
Естеріңізге сала кетейік, Атырауда блогерлер «Мемлекеттік сараптама орталығының» ғимаратына келіп, рұқсатсыз ішке кірмек болған. Бірақ 56 жастағы күзетші Хәкім Иманиязов оларды турникеттен өткізбеген. Осыған ашуланған блогерлер күзетшіні «сен бомжсың» деп келемеждеп, видеоға түсірген. Олардың ауыр сөздеріне шыдамаған ер адам миына қан шауып көз жұмды.