Өңірдегі карантин және шектеу іс-шаралары 25 мамырға дейін ұзартылады
Маңғыстау облысында карантин мен шектеу шаралары ұзартылды. Бұл туралы облыстық Қоғамдық коммуникациялар қызметі хабарлады.
Маңғыстау облысында коронавирусқа байланысты карантин 3 сәуірден бастап енгізілген еді. Кейін 30 сәуірге дейін, содан соң 11 мамырға дейін ұзартты.
Аймақтың бас мемлекеттік санитарлық дәрігері Ерғали Садымановтың жаңа қаулысына сәйкес, карантин және шектеу іс-шаралары 2020 жылдың 25 мамырында сағат 07:00-ге дейін ұзартылады.
25 мамырға дейін халықтың тыныс-тіршілігін қамтамасыз ететін автомашиналардан басқа, азаматтардың Маңғыстау облысына келуіне және шығуына тыйым салынады.
«Халықтың тыныс-тіршілігін қамтамасыз ететін автомашиналарды (азық-түлік өнімдерін тасымалдайтын жүк және жеңіл автомашиналар, дәрі-дәрмек құралдары, сондай-ақ ТЖ режимінде іске қосылған мамандандырылған және қызметтік машиналар) қоспағанда, облыстың қалалары, аудандары арасындағы қозғалысқа тыйым салынады.
Жұмысқа шығу міндетті түрде масканы киюмен 1,5-2 метр қашықтықты сақтай отырып - таңертең сағат 07:00-ден 10:00-ге дейін және кешке сағат 17:00-ден 19:00-ге дейін (жұмыс орнынан анықтама болған жағдайда) рұқсат етіледі», - делінген хабарламада.
Қаулы аймақта ойын-сауық, спорттық және басқа да бұқаралық іс-шараларды, сондай-ақ отбасылық іс-шараларын өткізуге, сауда-ойын-сауық орталықтарының, кинотеатрлардың, театрлардың, көрмелердің, фитнес-клубтардың және адамдар көп жиналатын басқа да объектілердің, діни объектілердің қызметіне тыйым салынады.
Қазіргі уақытта Қазақстанда коронавирус жұқтырғандардың саны 5090-ға жетті. 31 адам қайтыс болды және 1941 адам айықты.