Павлодарлық студент компьютер сататын дүкенді сотқа беріп, 400 мың теңге өндіріп алды

Павлодарлық азамат Instagram арқылы компьютер сатып алып, оны бөліп төлеуге рәсімдеді. Алайда, сатушы оны бұғаттап тастаған соң, жігіт сотқа жүгінуге мәжбүр болды, деп хабарлайды Azattyq Rýhy Павлодар-онлайнға сілтеме жасап.

Қаңтар айында Instagram әлеуметтік желісінде тұтынушы бағасы 374 900 теңге тұратын компьютерді сату туралы жарнаманы байқаған.

Павлодарлық азамат магистратурада оқиды, сондықтан диссертациясына қажетті материалдарды зерттеу үшін оған компьютер керек болған. Ол компьютерді бөліп төлеуге алуға шешім қабылдаған. Сатып алушы бөліп төлеуді рәсімдеу кезінде интернет-дүкендегі ЖШС атауы біреу болғанын, бірақ компьютерге төлем шоты басқа ЖШС атынан келгенін айтты.

Осыдан кейін банк тарапынан бөліп төлеу шарты бойынша келісім алынған. Компьютер құнына төлем жасалғанын растайтын чек сатушыға жіберілген. Алайда, интернет-дүкен төлем қабылданғаннан кейін сатып алушыға компьютерді сату және жеткізу бойынша өз міндетін орындамаған.

Қоңыраулар мен WhatsApp арқылы хабарламаларға сатушы жауап бермеген, кейін дүкен сатып алушының нөмірін толықтай бұғаттап тастаған. Павлодарлық азамат ақшасын қайтару үшін сотқа жүгінген. Сондай-ақ, ол моральдық зиянды өтеуді талап еткен.

Нәтижесінде Павлодар қалалық сотының шешімімен тұтынушының талаптары ішінара қанағаттандырылды. Сатып алушыға 405 494 теңге қайтарылды.