Депутаттар халықтың талабын ескеріп, үкіметте тыңдау өткізбек
Парламент Мәжілісінің депутаттары, «AMANAT» партиясы фракциясының мүшелері уақыт белдеуін өзгертуге қатысты бейнеүндеу жасады, деп хабарлайды Azattyq Rýhy.
Депутаттардың арнайы мәлімдеме жасауына мыңдаған халықтың арыз-шағымы, талап-тілегі себеп болған.
«Бүгін Мәжілісте «AMANAT» фракциясының арнайы жиынын өткіздік. Осындағы әріптестеріміз куә: осы жазда біз өңірлерді аралаған кезде, әсіресе Шығыс Қазақстан, Павлодар, Солтүстік Қазақстан, Абай облысы, Жетісу өңірінде халық тарапынан ең көп қойылған сұрақ уақыт белдеуіне байланысты болды. Ел бұрынғы уақытты қайтаруды талап етіп жатыр. Бәлкім, Қостанай, Қызылорда, Батыс Қазақстан үшін осы уақыт белдеуі ыңғайлы шығар. Бірақ Шығыс үшін тиімсіз. Біздің Шығыс Қазақстанда таңғы екі жарымда таң атады. Сиырдың мөңіреген дауысынан оянасың. Кешкі бес-алтылда тас-қараңғы», - дейді мәжілісмен Мақсат Толықбай.
Депутаттар екінші, үшінші ауысымда оқитын оқушылардың үйге қараңғы уақытта қайтатынына алаңдады. Өйткені ауылдарда, тіпті көшелерде жарық жоқ.
«Жеріміз үлкен болған соң, география бойынша уақыт белдеуі алдын ала зерттелуі керек еді. Денсаулыққа қаншалықты зиян екені, қанша энергия артық шығындап жатқанымыз. Сондықтан бүгін арнайы фракцияның жиынын өткіздік. Уәде еткендей, алдағы уақытта Парламенттің жалпы отырысында тыңдау өткіземіз. Үкімет мүшелері, ғалымдарды, мамандарды шақырып, бәріміз ақылдасып, Үкіметтің нақты шешім қабылдауына ықпал етеміз», - деді Толықбай.
Олар тіпті болмаса қысқы және жазғы уақытты енгізуді ұсынып отыр.
Ал депутат Гүлдара Нұрымова дәрігер ретінде уақыттың ауысқаны адамның денсаулығына үлкен зиян келтіріп жатқанын айтты.