2024 жылы жалпыға бірдей декларациялаудың үшінші кезеңі басталады
2021 жылдың 1 қаңтарынан бастап Қазақстанда кезең-кезеңімен жалпыға бірдей декларациялау енгізілді, деп хабарлайды Azattyq Ruhy Орталық коммуникациялар қызметіне сілтеме жасап.
Аталған шараның мақсаты - жеке тұлғалардың кірістерін бақылаудың тиімді тетіктерін құру, әділ салық салуды қамтамасыз ету және әлеуметтік саясатты жетілдіру, сыбайлас жемқорлық пен көлеңкелі экономика деңгейін төмендету.
ҚР ҚМ МКК Өндірістік емес төлемдерді, жеке тұлғаларды және арнайы салық режимдерін әкімшілендіру департаментінің директоры Нұржан Қуандықов жалпыға бірдей декларациялау кезеңдері туралы мәлімет берді.
2021 жылдың 1 қаңтарынан бастап «кіру» декларациясын мемлекеттік қызметшілер мен оларға теңестірілген адамдар тапсырды. Екінші кезеңде, жалпыға бірдей декларациялауға квазимемлекеттік сектордың мемлекеттік мекемелерінің қызметкерлері, сондай-ақ олардың жұбайлары қосылды. Шамамен 2,1 млн адам.
«2024 жылғы 1 қаңтарда жалпыға бірдей декларациялаудың үшінші кезеңі басталады. Бизнесмендер - жеке кәсіпкерлер, заңды тұлғалардың құрылтайшылары (қатысушылары), сондай-ақ олардың жұбайлары тапсырады», - деді спикер.
2025 жылы жалпыға бірдей декларациялауға азаматтардың басқа санаттары қосылады.
«Осылайша, 2025 жылы 13 млн астам декларация тапсырылады деп күтілуде», - деді Н.Қуандықов.
Авторы: Еркежан АЙТҚАЗЫ