Заңсыз құмар ойынын ұйымдастырушылардың тізімі жарияланды – ҚМА
Жыл басынан бері 19 заңсыз ойын мекемесі және 111 ойын терминалы анықталды
Қаржылық мониторинг агенттігі Қазақстан аумағында онлайн казино қызметін жүзеге асыратын ұйымдардың тізімін жариялады, деп хабарлайды Azattyq Ruhy.
Ведомство мәліметінше, аталған тізім Мемлекет басшысының заңсыз құмар ойындарды өткізуді шектеу туралы тапсырмасын орындау аясында Туризм және спорт министрлігімен бірлесіп құрылды.
Тізім қаржылық мониторинг субъектілерінің заңсыз ойын бизнесіне қарсы іс-қимыл шеңберінде және өз қызметінде пайдалануы үшін ҚМА порталында орналастырылған. Ол заңсыз ойын бизнесін жүзеге асыру кезінде қаржы ұйымдарының өнімдері мен қызметтерін пайдалану деңгейін төмендетуге бағытталған. Ойынға тәуелділік адам тағдырын бұзатын қауіпті құбылысқа айналады.
«Бұл проблема отбасылық, тұрмыстық зорлық-зомбылықтың туындауына және басқа да қылмыстық құқық бұзушылықтар жасауға алғышарттар туғызады. 2019-2022 жылдар аралығында 73 жасырын казино жойылып, 2280 ойын терминалы тәркіленді. Жыл басынан бері Агенттік қызметкерлері 19 заңсыз ойын мекемесін және 111 ойын терминалын анықтады», - делінген ҚМА хабарламасында.
Қабылданған алдын алу шараларының арқасында соңғы 5 жылда тіркелген істер санының 5,5 есеге төмендеуі байқалады.
Сонымен қатар бүгінде Агенттік заңсыз ойын қызметі (онлайн казино) белгілері бар әлеуметтік желілердегі сайттар мен аккаунттарға 3 мыңнан астам сілтемелерін бұғаттаған.
ҚМА азаматтардың құқықтарын қорғау және оларды заңсыз құмар ойындарға тәуелділіктен сақтау жөніндегі белсенді жұмысты жалғастырып жатыр.
