Тәртіптік жауапқа 37 тұлға тартылып, 270 үлескердің құқығы қорғалды
Қызылорда облысының прокуратура органдары жер қатынастары саласында жасалған талдаулар нәтижесінде 14 ұсыну, 1 наразылық енгізді. Сондай-ақ тәртіптік жауапқа 37 тұлға тартылып, 270 үлескердің құқығы қорғалып, 49 акт заңға сәйкестендірілді, деп хабарлайды Azattyq Ruhy.
Ведомствоның баспасөз қызметі мәлім еткендей, жерді сатып алу шарттары бойынша жер иеленушілердің төлемеген 25 млн теңгесі бюджетке өндірілді.
«Сонымен қатар кадастрлық құны 218 млн теңгені құрайтын жер учаскелері мемлекетке қайтарылды. Атап айтқанда, «Байқоңыр» әлеуметтік кәсіпкерлік корпорациясы» АҚ-мен (бұдан әрі - ӘКК) бірлескен жобамен құрылып, жүзеге асырылмаған инвестициялық жоба бойынша құны 115 млн теңге құрайтын жер учаскесі мемлекетке қайтарылды. Сол сияқты Сырдария ауданы прокуратурасы заңсыз табысталған кәсіпкерлік мақсаттағы кадастрлық құны 21,8 млн теңге 6 га жер учаскесін мемлекетке қайтарды», - делінген хабарламада.
Одан бөлек, прокуратура органдары пайдаланылмайтын жерлерді анықтау және шаралар қабылдау жөнінде уәкілетті органдардың жұмысын бақылауда. Жер кодексіне сәйкес пайдаланылмайтын жерлерді анықтау қала, аудан әкімдіктерінің жер саласындағы уәкілетті органының құзыретіне жатады.
«Бұл бағытта жұмыстар қарқынды жүргізілмеуіне байланысты прокуратураның бастамасымен 602,3 гектар 360 игерілмеген кәсіпкерлік мақсаттағы жер учаскелері анықталды. Нәтижесінде Қызылорда облысының жер ресурстарын басқару департаментіне ұсыну енгізіліп, бүгінгі күнге 150 жер учаскесіне қатысты нұсқама беріліп, мәжбүрлеп мемлекетке қайтару бағытында шаралар қабылданып жатыр», - дейді прокуратура өкілдері.
Сонымен қатар ауылшаруашылығы мақсатындағы жайылымдық жерлердің игерілу жағдайына аса назар аударылды. Бұл бағытта облыстың прокуратура органдары жергілікті әкімдіктермен бірлесіп пайдаланылмайтын жайылымдық жерлерді анықтау мақсатында жұмысшы топтарын құрды. Облыс бойынша елдімекеннің тұрғындарымен кездесу ұйымдастырылып, түсіндірме жұмыстары жүргізілді.
Биыл облыстың прокуратура органдары 138 мың га 133 жайылымдық жер учаскесінің игерілмегенін анықтап, қадағалау актілерін енгізді. Кадастрлық құны 80 млн теңге құрайтын 41 мың га 54 жер учаскесі қайтарылды.
Оның ішінде:
Мысалы, Қызылорда облысы, Сырдария ауданы, Айдарлы ауылдық округінде 13.04.2001ж. табысталған ауылшаруашылығы мақсатындағы кадастрлық құны 1,4 млн теңге 161 га жер учаскесінің 22 жыл бойы пайдаланылмағаны анықталып, мемлекетке қайтарылды.
Сол сияқты жергілікті атқарушы органдармен жайылымдық жерлердің жетіспеушілігі дұрыс айқындалмағаны анықталды.
Прокуратура бастамасымен әкімдіктер жайылымдық жерлерге түгендеу жүргізіп, нәтижесінде жайылым жетіспеушілігі 1,4 млн га-дан 530 мың га, яғни 63% азайды. Бұл бағытта жұмыстар жалғасып жатыр.