Тамызда білім беру саласының қызметкерлеріне жоғары сұраныс байқалды - Еңбекмин

Тамыз айында Электрондық еңбек биржасында жұмыс берушілер 128,6 мың бос жұмыс орнын, ал ізденушілер 105 мың түйіндемені орналастырды. Шілде айымен салыстырғанда бос орындар саны 30,6 мың бірлікке, ал түйіндеме – 11,7 мың бірлікке өсті. Бұл туралы Azattyq Ruhy ҚР Еңбек және халықты әлеуметтік қорғау министрлігіне сілтеме жасап хабарлайды.

«Ең көп бос жұмыс орындарын басқа қызмет түрлеріндегі кәсіпорындар (айына 10,2 мың немесе + 6% бос жұмыс орындары), негізгі және жалпы орта білім беретін мекемелер (айына 7 мың немесе +7%) және ауыл шаруашылығының (айына 6,1 мың немесе +24%) жұмыс берушілері орналастырды.

Өткен айда жоғары білікті кадрларға сұраныс күрт өсті, олар 59,5 мың (немесе 46%) бос жұмыс орындарын құрады. Тамыздағы сұраныстың 79%-ға өсуі білім беру саласының мамандарын қажет ететін ұйымдар есебінен болжамды және табиғи түрде қамтамасыз етілді», - деп мәлім етті ведомстводан.

Бұл ретте шілде айымен салыстырғанда тамыз айында біліктілігі орташа мамандарға сұраныс 16%-ға (43 мың бос орынға дейін) өсті және жұмыс берушілердің біліктілігі жоқ жұмыскерлерге деген сұранысы (-6%, 26 мың бос орынға дейін) шамалы төмендеді.

Сонымен қатар еңбек нарығында ұсыныс жағынан да осындай жағдай байқалады. Осылайша, тамыз айында түйіндемелердің көпшілігі жоғары білікті ізденушілерден келді (58% немесе 60,7 мың түйіндеме), оның 46% - ы білім беру саласында жұмыс іздеушілерден болды.

«Өңірлік бөліністе Түркістан облысын қоспағанда (-11%), барлық өңірлерде бос орындар санының өсуі байқалады. Төрт өңірдің – Алматы және Астана мегаполистері мен Қостанай және Қарағанды облыстарының жұмыс берушілері жұмыскерлерді белсенді іздестіруді жүргізді, олардың үлесіне 44 мың түйіндеме (тамыз айында орналастырылғандардың 34%) тиесілі болды. Маңғыстау және Қызылорда облыстарында, сондай-ақ Шымкент қаласында еңбек нарығында сұраныстың артуы нәтижесінде бос орындар санының түйіндеме санынан басым болуы орта есеппен 2,8 мың бірлікті құрады. Түркістан облысы өңірлер арасында түйіндеме мен бос орындар саны (12 мың бос жұмыс орны және 7,5 мың түйіндеме) арасындағы айырмашылық бойынша көшбасшы болып табылады», - деп жазылған хабарламада.

Электрондық еңбек биржасында тапшы мамандар негізінен байланыс орталықтарының операторлары (орналастырылған бос орындар саны түйіндемелер санынан 6,9 мың бірлікке артық), математика мұғалімдері (1,7 мың бірлікке), сондай-ақ мектепке дейінгі білім берудегі тәрбиешінің көмекшілері (тиісінше 990 бірлікке) болды. Сонымен қатар, шет тілі мұғалімдерінің түйіндемелерінің саны, керісінше, ұқсас бос орындар санынан 1,6 мың бірлікке, қазақ тілі мен әдебиеті мұғалімдерінен 1,4 мың бірлікке, дене шынықтыру және спорт мұғалімдерінен 1,1 мың бірлікке артық болды.

Тамыз айында жұмыс берушілер қондырғылардың бастықтарына (орта есеппен 845 мың теңгеден бастап), өнеркәсіптегі ауысым бастықтарына (760 мың теңгеден бастап), сондай-ақ медициналық зертханалар меңгерушілерінің орынбасарларына (700 мың теңгеден бастап) ең жоғары жалақы мөлшерін ұсынды. Жоғары жалақы қалайтындар қатарында авиациялық диспетчерлер (5 млн теңгеден бастап), флоттағы штурмандар (1,5 млн теңгеден бастап), сондай-ақ жабдықтау басқармаларының басшылары (1,4 млн теңгеден бастап) болды.

Осылайша, тамыз айында білім беру саласындағы жұмыс берушілер мен ізденушілердің белсенділігінің арқасында бос жұмыс орындарының да, түйіндемелердің де өсуі қамтамасыз етілді.