Ақтаудың бірнеше шағынауданы жарықсыз қалды: МАЭК түсініктеме берді
Қазіргі уақытта жылу электр станциясының жұмыс режимін қалпына келтіру жүргізіліп жатыр
![Ақтаудың бірнеше шағынауданы жарықсыз қалды: МАЭК түсініктеме берді](https://azattyq-ruhy.kz/cache/imagine/main_page_full/uploads/news/2023/08/11/64d6404e56a6d511139602.png)
«Маңғыстау атом энергетика комбинаты» ЖШС (МАЭК) бүгін Ақтауда жарықтың өшірілуіне қатысты түсініктеме берді, деп хабарлайды Azattyq Rýhy.
«11 тамыз күні сағат 15:25-те жылу электр станциясының АТ-2 автотрансформаторын синхрондау кезінде жүктемесі 142 МВт болатын №3 энергоблогы сөніп қалды. Қазіргі уақытта жылу электр станциясының жұмыс режимін қалпына келтіру жүргізіліп жатыр. Айта кетейік, «Электр энергетикасы туралы» ҚР Заңы аясында 2023 жылдың 1 шілдесінен бастап электр энергиясының теңгерімдеуші нарығына Бірыңғай сатып алушы – «Есеп айырысу-қаржы орталығы» ЖШС енгізілді. Осы ретте, станцияларда электр энергиясынан авариялық ажырату болған жағдайда, яғни баланстан ауытқу кезінде Қазақстан бойынша жүйелік оператор – «KEGOK» АҚ электр жүйесін реттеуді қамтамасыз етуі тиіс», - делінген «МАЭК» ЖШС-нің хабарламасында.
Айта кетейік, бүгін түстен кейін Ақтауда бірқатар шағынаудан мен бір ауыл жарықсыз қалған.