Израильге кіру үшін қазақстандықтарға виза қажет
«Алматы – Тель-Авив» бағыты бойынша тікелей рейске билет сатылымы басталды, деп хабарлайды Azattyq Ruhy ҚазАқпарат-қа сілтеме жасап.
Қыркүйектен бастап қазақстандықтар Тель-Авивке бейсенбі және жексенбі күндері Air Astana әуе компаниясының AIRBUS А321LR заманауи әуе кемесімен саяхаттай алады. Рейс бейсенбі күні сағат 4:30-да Тель-Авивке ұшып, 08:15-те қонады, жексенбіде сағат 04:10-да ұшып, 07:55-те қонады.
Қайтарда рейстер сағат 09:30-да ұшып, Алматыға сағат 18:20-да қонады.
«Тель-Авив қаласы Жерорта теңізі бойындағы құмды жағажайларымен танымал және туристерге мәдениеттің, сәулеттің, тарихтың, ойын-сауықтың және аспаздықтың ерекше үйлесімін ұсынады. Израильге кіру үшін қазақстандықтарға виза қажет. Біз жолаушыларымызға Air Astana рейстері арқылы Таяу Шығыстағы бірегей елді ашуға шақырамыз. Израиль мемлекеттік органдарының талабымен міндетті жеке тексерудің, сондай-ақ жолжүкті және қол жүгін тексерудің қосымша рәсімдерінен өту үшін ертерек келуді сұраймыз», - деп жазылған авиакомпания хабарламасында.