Арыстанбек Мұхамедиұлының ісі: прокурор шендіні 9 жылға бас бостандығынан айыруды сұрады

ҚР Ұлттық музейінің бұрынғы директоры әрі экс-министр Арыстанбек Мұхамедиұлының ісі бойынша айыптаушы тарап шендіні 9 жылға бас бостандығынан айыруды сұрады, деп хабарлайды Azattyq Rýhy.

Астана қаласы Байқоңыр ауданының №2 сотында Арыстанбек Мұхамедиұлының ісі бойынша тараптардың жарыссөздері басталды.

Прокурор Еркеғали Закиров айыптау қорытындысын жариялап, Арыстанбек Мұхамедиұлын ҚР ҚК-ның 28-бабы 3-бөлігі (қылмысты ұйымдастыру) және 189-бабы 4-бөлігі (аса ірі мөлшерде сеніп тапсырылған бөтеннің мүлкін ұрлау және иемдену) бойынша кінәлі деп тануды сұрады.

Аталған баптар бойынша мемлекеттік айыптаушы Арыстанбек Мұхамедиұлына мүлкін тәркілеусіз 9 жыл бас бостандығынан айыруды, мемлекеттік қызметте қызмет атқару құқығынан өмір бойына айыруды ұсынды.

Тағы үш сотталушы – Алмаз Нұразхан, Азамат Көшенов және Айым Сәдуақасованы да прокурор кінәлі деп тануды және олардың әрқайсысына 8 жыл бас бостандығынан айыру жазасын тағайындауды сұрады.

Айта кетейік, Астанадағы Байқоңыр ауданының №2 сотында Арыстанбек Мұхамедиұлының ісі бойынша негізгі сот талқысы 17 сәуірде басталған болатын.