«Кезек қашан жылжиды?»: Қостанайда жетімдер үйінің түлегі әкімдікпен соттасып жатыр

Жетімдер үйінен шыққан Руслан Қонақбаевтың тұрғын үй қатынастары бөліміне және Қостанай әкіміне қатысты талап арызы бойынша сот процесі 6 сәуірде мамандандырылған ауданаралық әкімшілік сотында онлайн режимінде өтті, деп хабарлайды Azattyq Ruhy Наша Газета сайтына сілтеме жасап.

Руслан – жетім, 1-ші топтағы мүгедек. 2023 жылғы ақпанда ол азаматтарды бірыңғай қабылдау кезінде Қостанай облысының әкіміне жүгінді. Дәл осы мәселе жуырда сотта қаралатындықтан, Құмар Ақсақалов ол кезде түсініктеме берген жоқ.

«2013 жылы мен балалар орталығында тәрбиеленіп жүрген кезімде «жетім балалар» санаты бойынша мемлекеттік тұрғын үй қорынан баспана алуға кезекке тұрдым. Мен кезекке тұрғанда менің кезегім №2162, қазір № 835 болдым. Ақпараттық жүйе базасында Kezekte.kz 2018 жылдан бастап баспана алған жетім балалар туралы деректер жоқ. 2017 жылғы статистика бар, онда тек 1 адам ғана көрсетілген. Қосымша ақпарат жоқ. 20 қаңтарда жетім балаларға Қостанай әкімдігінің тұрғын үй қатынастары бөлімінің ақпараты бойынша 22 пәтер берілді. 2010 жылдан бері пәтер алу үшін кезекте тұрған таныс жетім қыз пәтер алғанын айтты. Айырмашылық небәрі 3 жыл, бірақ мен әлі де № 835-те тұрмын! Кезек қашан алға жылжиды және әділеттілік қайда?!», -  деді Руслан сот отырысында.

Оның пікірінше, кезек осы уақыт ішінде еш қозғалған жоқ, бұл шенеуніктер тарапынан заңнаманы бұзу болып табылады.

«Жетім балалар санаты бойынша кезек автоматты түрде ілгерілейді. Ол кезекте тұрған адам қайтыс болғанда немесе сот шешімі бойынша ғана өзгеруі мүмкін», - деп түсіндірді Қостанай әкімінің өкілі Алтын Төлекова.

Қонақбаев автоматтандырылған жүйеде қателер болуы мүмкін екенін айтты. Сондай-ақ, «жүйенің бұзылмайтындығына кепілдік бар ма?» деп сұрады. Ол облыс прокуратурасынан осы ақпараттық жүйені әзірлеушіге қатысты тексеріс жүргізуді сұрады, сондай-ақ соттың келесі отырыстарында жауап алуы туралы өтініш білдірді. Судья екі өтінішті де қанағаттандырды.

«Біздің тарапымыздан қателіктер болуы екіталай - бізде мемлекеттік қызмет істері агенттігі департаментінің қызметкерлері тарапынан үнемі тексерулер өткізіліп тұрады. Осы базада деректерді қалпына келтірумен айналысатын қызметтер бар, бұл әкімдіктің құзыретінде емес», - деп түсіндірді Төлекова.

«Қонақбаев 2013 жылғы 24 қазанда Тұрғын үй алуға кезекке тұрып, 10 жыл ішінде өз позициясын № 2 162-ден № 835-ке ауыстырды. Демек, осы уақыт ішінде мемлекеттен 1500-ге жуық адам пәтер алды», - деп түсіндірді Қостанай әкімдігінің тұрғын үй қатынастары бөлімінің өкілі Владимир Моисеенко сотта.

«Заңда осы санаттағы тұрғын үй 29 жасқа дейін берілетіні көрсетілген. Кезекте тағы 800 адам тұр, мен бұл қарқынмен үлгере алмаймын! Неге 2010 жылы кезекке тұрғандар пәтер алды, ал мен әлі алмадым?»,- деді Қонақбаев өз алаңдаушылығын білдіріп.

Моисеенко «жетім балалар» санаты бойынша азаматтар тек 29 жасқа дейін кезекке тұра алады, бірақ кезектегі адамдар бұл жастан асып кетсе, оларға пәтер берілетінін айтты.

Келесі сот отырысы 18 сәуірге белгіленді.