«Әбу-Даби Плазадағы» жұмысшылар құқығын соңына дейін қорғаймыз – кәсіподақ

16 қыркүйекте астанадағы ең биік ғимараттың құрылысына тартылған  жергілікті 40 адам заңсыз жұмыстан  қуылғандарын мәлімдеді. Олар еңбек келісім-шарты бұзылғаны туралы ешқандай хабарлама алмапты. Жұмыстан шыққандарын телефон арқылы естіген.

Azattyq Rýhy, тілшісіне Нұр-Сұлтандағы Кәсіподақ орталығының төрағасы қазақстандық жұмысшылардың құқығын қорғаумен айналысып жатқандарын хабарлады.  Қазіргі уақытта бас мердігер  «Arabtec CCL» компаниясының филиалымен жасасқан ұжымдық келісім-шарты зерттеліп –зерделеніп жатыр.

«Мердігер ұйымдар белгілі бір жұмыс көлеміне қатысты келісім-шарт жасасады. Соған қарап белгілі бір мерзімге жұмысшыларды алады. Келісім-шарт мерзімі аяқталған кезде кейбір компаниялар жұмысшыларға өтемақы қарастырады. Кейбірі жоқ. Бұл заңға қайшы емес. Ал 40 жұмысшыға қатысты егер еңбек келісім-шартында басқа жұмыспен қамту туралы жазылса, біз олардың құқықтарын қорғайтын боламыз».- деді Тастанбек Есентаев.

Бұл алғашқы жағдай емес. «Әбу Даби Плаза» құрылысы кезінде мұндай бірнеше дерек тіркелген. Еңбек және хылықты әлеуметтік қорғау министрі Біржан Нұрымбетовтің айтуынша былтыр жазда құрылыс нысанында 4 бірдей қақтығыс болған. «Олар ұлтаралық сипатқа ие болғанымен, шын мәнінде  жергілікті және шетелдік жұмысшылар арасындағы еңбек теңсіздігі түрткі болған», - дейді министр.

«Шетелдік жұмысшыларға көп жалақы төленген. Мәселе арнайы шақырылған мамандарға қатысты. Олар өз мамандарын көп шақырған. Министр жиналыста былтыр жазда  4 бірдей кикілжің болғанын айтты. Оның себебі шетелдік жұмысшыларға түскі асқа 3000 теңге берсе, жергілікті жұмысшыларға 800 теңге төлеген. Иә, біз мұны әділетсіз деп есептейміз. Ол (Еңбек және әлеуметтік министрі - Azattyq Rýhy ) бізге ұжымдық келісім-шартты жіті тексеруге ұсыныс айтты. Біз жергілікті жұмысшыларға қатысты мұндай теңсіздік болмауын талап етеміз»,- деп мәлімдеді Кәсіподақ орталығының төрағасы.  

Естеріңізге сала кетейік, Нұр-Сұлтандағы «Әбу-Даби Плаза» кешені 2020 жылы елорда күніне орай  пайдалануға беріледі. Нысан құрылысы 2010 жылы қараша айында басталған. 2016 жылдың соңында толық тапсырылуы тиіс еді. «Әбу-Даби Плаза» 75 қабаттан тұрады.  Ғимарат биіктігі шамамен 320 метр. Жалпы аумаға 510 мың шаршы метр. Ол Орталық Азиядағы ең биік ғимарат болады деп күтіледі.