Оқиға 20 қыркүйекте болған
Жетісу облысында жүк пойызының машинисі теміржол бойында жалғыз жүрген төрт жасар баланы байқап, оны құтқарып қалған, деп хабарлайды Azattyq Rýhy.
Оқиға 20 қыркүйекте сағат 12:30 шамасында Сарыөзек – Үштөбе учаскесінің Тауарасы – Айнабұлақ аралығында болған.
Жүк пойызы Айнабұлақ станциясына қарай қозғалып бара жатқан кезде машинист теміржол төсемі маңынан жалғыз жүрген баланы байқайды. Пойыз шамамен 38 км/сағ жылдамдықпен қозғалып келе жатқан.
«Машинист қызметтік тежеуді қолданып, пойызды тоқтатып, баланы локомотив кабинасына алып кірді. Кейін болған жағдай туралы пойыз диспетчеріне хабарлады», - деп жазды ҚТЖ баспасөзі.
Осылайша ол төрт жасар бүлдіршінді қауіпсіз жерге, дәлірек айтқанда, Айнабұлақ станциясының кезекшісіне тапсырған. Станция кезекшісі баланың ата-анасымен байланысқан.
Бұл жағдай туралы редакция ҚР ІІМ Көліктегі жол полиция департаментіне ресми сауал жолдады.
«Үштөбе станциясындағы көлік полициясы бөлімінің қызметкерлері теміржол жолдарына жақын жерде жүрген баланың ата-анасын жедел анықтап, полиция бөліміне жеткізді. Баланың қауіпсіздігін қамтамасыз ету жөніндегі ата-аналық міндеттерін тиісінше орындамағаны үшін баланың анасына қатысты әкімшілік іс қозғалды. Бала зардап шеккен жоқ және ата-анасына тапсырылды. Көлік полициясы теміржолдың қауіптілігі жоғары аймақ екенін ескертеді. Кішкентай балаларды, тіпті аз уақытқа болса да, қараусыз қалдырмау қажет. Бір сәттік салғырттық қайғылы жағдайға әкелуі мүмкін», - деп мәлімдеді Көлік полициясы департаменті.