Каспий теңізінің жағасында тағы да өлі итбалықтар анықталды

Каспий теңізінің жағалауынан өлі итбалықтар тағы табылды, деп хабарлайды Azattyq Rýhy Lada.kz-ке сілтеме жасап.

Маңғыстау облыстық экология департаментінің мәліметінше, 1 маусым күні Түпқараған ауданы жағалауынан тағы 20 өлі итбалықтың денесі анықталған.

«Тұщыландыру зауытынан Баутино ауылындағы “KCA” жағалауына дейінгі аумақта 20 итбалықтың және бекіре тұқымдас 8 балықтың өлексесі табылды», – деп мәлімдеді ведомство.

2 маусымда зертханалық-талдамалық бақылау бөлімінің мамандары Түпқараған ауданындағы Форт-Шевченко қаласының теңіз жағалауынан су сынамаларын алды.

Зерттеу нәтижелері кейінірек жарияланады.

Еске салайық, бұған дейін де Ақтауда жағажайдан өлі итбалықтар табылған болатын.