Оның сөзінше, қаңғыбас иттер мектеп жанында үймелеп жүреді
Қоғам белсендісі Мұхтар Өтес Парламентте қаралып жатқан «Жануарларға жауапкершілікпен қарау туралы» Қазақстан Республикасының Заңына өзгерістер мен толықтырулар енгізу туралы» заң жобасына қатысты өзінің пікірін білдірді. Айтуынша, кейінгі кездері Батыс Қазақстан облысында бұралқы иттер мәселесі өзекті болып отыр, деп хабарлайды Azattyq Rýhy.
«Мектептің жанында қараусыз иттер шұбырып жүр. Осыдан екі жыл бұрын оқушы баланы ит қауып, құлатқан. Бала жанұшыра қашамын деп аяғын екі жерден сындырып алған болатын. Соның салдарынан жасөспірім мүгедек болып қалды. Талай күрделі отаны бастан өткерсе де, баланың бір аяғы екіншісінен қысқа болып бітті», - дейді ол.
Оның айтуынша, жануарларды қорғаумен айналысатын белгісіз ұйым қаңғыбас иттерді ұстап отыр, алайда ешқандай қауіпсіздік шаралары жасалмаған.
«Бұл жерде қаңғыбас жануарларды қорғаумен айналысатын, мемлекеттен субсидия алатын ұйым бар. Олар қараусыз жүрген иттерге тамақ беріп жүреді, кейде «памперс» сатып алып кигізеді, бірақ ешқандай чипі мен тұмсыққабы жоқ. Мектептің маңында қаңғыбас иттер топтасып жүреді. Оқушы балалары бар ата-аналар уайымдайды. Иттер балаларды жиі қуады», - дейді ол.
Қоғам белсендісі заңға өзгерістер енгізілгені дұрыс дейді.
«Бұл біздің көптен күтіп жүрген заңымыз. Қазақ баласы болға соң, итті жеті қазынаның бірі, адамның серігі санаймыз. Бірақ иттің орны аулада екенін ұмытпау керек. Жануар қожайынының жері мен малын қорғауы керек және әрдайым иесінің қасында жүруі керек. Салтымызда солай қалыптасқан. Итті бейберекет жіберіп қойса, ол бұралқы, аш итке айналады. Құтырма ауруын да таратады. Балаға шабатын болса, бұның арты қайғылы жағдайға әкеп соғуы мүмкін. Баланы өмірінен артық, адамның өмірінен қымбат ештеңе жоқ. Біздің Конституциямызда бұл тайға таңба басқандай жазылып тұр. Сондықтан итті адам баласынан жоғары қоюдың қажеті жоқ деп ойлаймын. Далада емін-еркін жүгіріп ойнағысы келген баламызды иттен қорғай алмасақ, не болғанымыз? Қанша рет осындай резонансты оқиғаларды айтып, жария етіп жүрміз. Соның арқасы деп ойлаймын, Парламентте осы мәселені көтеріліп жатыр. Халықтың қауіпсіздігі үшін заң нормасы өзгеріп жатыр. Бұл өзгеріс бізге керек», - деді Мұхтар Өтес