Конституцияға – 30 жыл: Мәжіліс төрағасы халықты мерекемен құттықтады

Қазақстан Республикасы Мәжілісінің төрағасы Конституция күнімен ел азаматтарын құттықтап, Ата заңның ел дамуы мен қоғам бірлігіндегі рөліне тоқталды, деп хабарлайды Azattyq Rýhy. 

Конституция – елдіктің негізі

Мәжіліс төрағасының айтуынша, Ата заң Қазақстан мемлекеттілігінің өзегін айқындап, елдіктің тұғырына айналды.

Биыл Конституцияның қабылданғанына 30 жыл толып отыр.

 «Онда халқымыздың сан ғасырлық дәстүрі мен арман-аңсары, заманауи әлемдік озық құқықтық нормалар нақты көрініс тапқан. Осы жылдар ішінде Конституция еліміздің саяси және құқықтық жүйесінің негізін қалап, қоғамның берік қағидаттарын бекітті», – делінген құттықтауда.

Реформалар мен жаңғыру

Төраға Конституцияға енгізілген түбегейлі түзетулердің маңызын ерекше атап өтті.

• Мемлекет басшысы Қасым-Жомарт Тоқаевтың бастамасымен жүргізілген ауқымды реформалар нәтижесінде Конституция заман талабына сай жаңарды;
• Бұл өзгерістер елдің дамуына тың серпін беріп, азаматтардың құқықтары мен еркіндіктерін қорғауды күшейтті;
• Конституция қоғамның тұрақтылығын қамтамасыз етіп, Қазақстанды әлемдік деңгейде орнықты мемлекетке айналдырды.

Әділет пен заң үстемдігі

«Заң үстемдік еткен жерде әділет салтанат құратыны анық. Ендеше, Конституциямыз заң мен тәртіптің қанат жаюына барынша ықпал етіп, ұлтымызды ұлы мұраттарға бастай берсін», – деді Мәжіліс төрағасы.

Ол барша қазақстандықтарға шаттық, береке-бірлік және бейбіт өмір тіледі.