2022 жылдың ақпанынан бері АҚШ Киевке 62 миллиард доллардан астам қаражат бөлген
АҚШ Украинаға 988 миллион долларлық жаңа көмек пакетін әзірлегенін жариялады. Бұл пакет Ресейдің басқыншылығына қарсы күресті жалғастырып жатқан Украинаға жаңа қару-жарақ пен жабдық түрінде ұсынылады, деп хабарлайды Azattyq Rýhy Reuters ақпараттық агенттігіне сілтеме жасап.
Пентагонның мәліметінше, бұл қаржы жоғары мобильді артиллериялық зымыран жүйелері (HIMARS) үшін оқ-дәрілер, дрондар және артиллериялық жабдықтарға қосалқы бөлшектер сатып алуға жұмсалады. Көмек пакеті Украинаға қауіпсіздік саласындағы көмек көрсету бастамасының (USAI) шеңберінде бөлінеді.
Байден әкімшілігі бұл жолы қаруды АҚШ-тың өз қорынан емес, өнеркәсіптен сатып алу арқылы жеткізуді жоспарлап отыр. Бұған дейін АҚШ президенті Джо Байден төтенше жағдайларда Конгресстің мақұлдауынсыз қордағы артық қару-жарақты Украинаға беру құқығын жиі пайдаланған болатын.
USAI қорының бұл пакеті қару-жарақ өндірушілерден жаңа жабдықтар сатып алуға бағытталған. Байден әкімшілігі әлі де Конгресс бөлген 6 миллиард долларлық төтенше көмек қаражатын қолдана алады. Бұл сомаға 2024 жылы мақұлданған қаржы мен Пентагонның Украинаның қажеттіліктерін қайта бағалағаннан кейінгі үнемделген қаражат кіреді.
2022 жылдың ақпанында Ресей Украинаға басып кіргеннен бері, АҚШ Киевке 62 миллиард доллардан астам қауіпсіздік көмегін бөлген.