Бауыржан Байбек Шымкентте өрт салдарынан баспанасыз қалған тұрғындармен кездесті

Олар қараша айында баспаналы болады

Бауыржан Байбек Шымкентте өрт салдарынан баспанасыз қалған тұрғындармен кездесті

«Nur Otan» партиясы Төрағасының бірінші орынбасары Бауыржан Байбек Оңтүстікке сапары барысында Шымкент қаласында болып, былтыр өрт салдарынан баспанасыз қалған тұрғындармен жүздесті.

«Шымкент қаласында былтырғы маусым айында үйлері өртенген Водопьянов көшесіндегі көпқабатты үйдің тұрғындарымен кездестім. Бұл – бір жыл ішіндегі үшінші кездесуіміз. Тұрғындарды алдағы қоныс тойларымен құттықтадым.

Жаңа тұрғын үй салу мәселесі жыл бойы партияның ерекше бақылауында болды. «Nur Otan» депутаттарының қолдауымен 5 қабатты үйді салуға және инженерлік желілерді тартуға жергілікті бюджеттен 550 млн. теңге бөлінді. Жұмыстың сапасы мен мерзімінің сақталуын партиялық бақылау комиссиясы қадағалады», - деп жазды партия Төрағасының орынбасары өзінің Facebook-парақшасында.

Енді 42 отбасы осы қараша айында құқық белгілейтін құжаттарын қолдарына алып, жаңа пәтерлерге қоныстана алады.

«Осы сәтті пайдалана отырып, қиындыққа тап болғандарға қол ұшын созып, уақытша баспанамен, киім-кешекпен және барлық керек-жарағымен қамтамасыз еткен барша партияластар мен ақжүрек азаматтарға алғыс білдіремін», - деп жазды партия Төрағасының бірінші орынбасары желідегі парақшасында.

×
Бұл желілік ресурстың ақпараттық өнімдері 18 жастан асқан адамдарға арналған.