Президент бұны бүгін Астанада өтіп жатқан диалог-платформада айтты
Президент Қасым-Жомарт Тоқаев президент сайлауы өтіп, мемлекет басшысы болғаннан кейін ең бірінші қандай Жарлыққа қол қойғанын еске алды, деп хабарлайды Azattyq Rýhy.
Оның айтуынша, президент қол қойған алғашқы құжат ауылдың дамуына арналған екен.
«Ауыл – төл өркениетіміздің алтын қазығы. Ауылды өркендету – баршаға ортақ парыз. Мемлекет бұл мәселеге ерекше жауапкершілікпен қарайды. Өздеріңіз білесіздер, 2022 жылы халыққа ұсынған сайлау алдындағы бағдарламада ауыл мәселесіне айрықша назар аудардым.Алғашқы Жарлығым да ауылды дамытуға арналды», - деп еске салды Тоқаев.
Оның айтуынша, сол Жарлыққа сай Қазақстан Республикасының ауылдық аумақтарын дамытудың 2023-2027 жылдарға арналған тұжырымдамасы әзірленген. Қазір осы құжатқа сай нақты жұмыс атқарылып жатыр.
«Жуырда ғана Ауыл еңбеккерлерінің екінші форумын өткізіп, осы саладағы өзекті мәселелерді қарадық. Ал бүгін ауыл-аймақтардың даму бағдарын айқындаймыз. Бұл – мемлекеттің алдында тұрған стратегиялық міндеттің бірі», - деді Тоқаев.