Ал келесі аптада Астанаға Эстонияның президенті келеді
Ақорда президент Қасым-Жомарт Тоқаевтың тығыз жұмыс кестесін жариялады, деп хабарлайды Azattyq Rýhy.
Ақорданың мәліметінше, 14 қараша күні президент Қасым-Жомарт Тоқаев Астанада өтетін Ауыл шаруашылығы еңбеккерлерінің екінші форумына қатысады.
Жиын барысында аграрлық саланы дамытудың өзекті мәселелері талқыланады.
14-15 қараша күндері Қасым-Жомарт Тоқаев Өзбекстан президенті Шавкат Мирзиёевтің шақыруымен Ташкентке мемлекеттік сапармен барады.
Мемлекеттер басшылары тет-а-тет форматында келіссөз жүргізеді, сондай-ақ президенттердің төрағалығымен Қазақстан-Өзбекстан Жоғары мемлекетаралық кеңесінің екінші отырысы өтеді.
16 қарашада президент Ташкентте өтетін Орталық Азия және Әзербайжан мемлекеттері басшыларының VII Консультативтік кездесуіне қатысады.
17-19 қараша күндері Астанаға Эстония президенті Алар Карис мемлекеттік сапармен келеді.
Ақордада мемлекеттер басшылары жоғары деңгейде келіссөз жүргізіп, екіжақты ынтымақтастық перспективасын талқылайды.