Орташа өнімділік гектарына 16,1 центнерді құрайды
Ақмола облысында биылғы астық жинау науқаны тарихтағы ең табысты науқанның бірі болды. Өңір диқандары 7,1 миллион тоннадан астам астық жинады, бұл жалпы егістік алқабының 94 пайызына тең, деп хабарлайды Azattyq Rýhy.
Орташа өнімділік гектарына 16,1 центнерді құраса, кейбір шаруашылықтарда бұл көрсеткіш 60 центнерге дейін жеткен. Жиналған астықтың басым бөлігі – жоғары сапалы.
«Жинау науқанының қорытындысы бойынша 7,4 миллион тоннадан астам астық жинаймыз деп күтілуде. Бұл – тек өңір тарихындағы емес, ел бойынша да ең жоғары көрсеткіштердің бірі», – деді облыстық ауыл шаруашылығы және жер қатынастары басқармасының басшысы Нұрбек Бадырақов.
Облыстың ауыл шаруашылығы өндірушілеріне жалпы сомасы 243 миллиард теңге көлемінде мемлекеттік қолдау көрсетілді.
Сонымен қатар 927 фермер жеңілдетілген несиелеумен қамтылып, оның жалпы көлемі 118 миллиард теңгеге жетті.
Бұл қолдау агротехникалық іс-шаралардың толық әрі сапалы орындалуына мүмкіндік берді:
Биыл облыстағы егіс алқабы 300 мың гектарға ұлғайып, жалпы көлемі 5,5 миллион гектарды құрады.
Мемлекет басшысының тапсырмасына сәйкес, өңірде егіс құрылымын әртараптандыру бойынша жүйелі жұмыс жүргізілуде.
Соңғы екі жылда жоғары табысты майлы дақылдардың көлемі 2,5 есеге өсіп, алғаш рет 500 мың гектарға жетті.
Жинау науқанына барлығы 7 мыңнан астам комбайн, оның ішінде 4,8 мың заманауи жоғары өнімді техника, 2,7 мың орақ және 4,8 мың жүк көлігі тартылған.
Жаңа өнімді қабылдау және сақтау үшін 7,2 миллион тонна сыйымдылықтағы инфрақұрылым дайындалды.
Оның ішінде 66 астық қабылдау кәсіпорны, 1,5 мың ауыл шаруашылығы қоймасы бар.
Сондай-ақ астық сақтау жеңдері мен кептіргіштер кеңінен қолданылып, дән сапасын сақтауға мүмкіндік беріп отыр.
Келесі жылғы егінге арналған тұқым толық дайындалған. 2025 жылдың қорытындысы бойынша Ақмола облысы ауыл шаруашылығы өнімдерінің жалпы шығарылымын 1,2 триллион теңге деңгейінде қамтамасыз етіп, елдің аграрлық секторының көшбасшысы мәртебесін нығайтпақ.