Инженерия, IT, медицина: Қазақстандағы мектептерде бейіндік сыныптар ашылып жатыр

Жұмысшы мамандықтары жылында еліміздің орта білім беру ұйымдарында 1000 бейіндік сынып ашу қолға алынды. Бұл бастама арқылы 31 000-нан астам оқушы еңбек нарығында сұранысқа ие мамандықтар бойынша алғашқы кәсіби дағдыларға үйренеді. Бұл туралы Azattyq Rýhy агенттігі Оқу-ағарту министрлігінің баспасөз қызметіне сілтеме жасап хабарлайды.

Негізгі мақсат – оқушыларды еңбек нарығына ерте бейімдеу

Жоба мектеп оқушыларының кәсіби бағдарын жүйелі түрде қалыптастыруға және техникалық-кәсіптік білімге қызығушылығын арттыруға бағытталған.

Қай бағыттар бойынша сыныптар ашылады

2025-2026 оқу жылында ашылатын бейіндік сыныптар келесі бағыттарды қамтиды:

• техникалық және инженерлік мамандықтар;
• ақпараттық-коммуникациялық технологиялар;
• ауыл шаруашылығы және экология;
• көлік және логистика;
• қызмет көрсету саласы;
• шығармашылық пен мәдениет;
• медицина және әлеуметтік қызмет көрсету.

Бейіндік сыныптардың ерекшелігі

Бейіндік сыныптар 9-11-сынып оқушыларына арналған. Әр өңірде олар нақты кадр тапшылығын ескере отырып жұмыс істейді. Процеске жергілікті жоғары оқу орындары, колледждер және жұмыс берушілер тартылады.

Айта кетейік, бейіндік бағытты оқу жылы ішінде екі рет өзгертуге мүмкіндік бар.