Қазір дәрігерлер сарбазға қажетті көмек көрсетіп жатыр
Алматыда Ұлттық ұланның мерзімді қызметіндегі әскери қызметші үшінші қабат терезесінен секіріп, медицина мекемесіне жеткізілді. Оқиға туралы ақпаратты «Оңтүстік» өңірлік қолбасшылықтың баспасөз қызметі растады. Қазір дәрігерлер сарбазға қажетті көмек көрсетіп жатыр, деп хабарлайды Azattyq Rýhy.
Бейнебақылау жазбалары сыртқы араласудың болмағанын көрсетті. Факт бойынша қызметтік тексеріс тағайындалды, оқиғаның себеп-салдары анықталып жатыр.
Ведомство дерегінше, әскери қызметшіде «бейімделу бұзылысы» байқалған. Сарбаз әскерге шақырылғанға дейін жақын туысынан айырылған, сондай-ақ ол әскери-дәрігерлік комиссияның шешімін күтіп жүрген.
«Сарбаз әскерге дейін жақын туысынан айырылған. Қызмет барысында бейімделу бұзылысының белгілері анықталды. Бейнежазбаларда үшінші тұлғалардың араласуы байқалмайды. Оқиғаға байланысты қызметтік тексеріс жүріп жатыр», — деп хабарлады Ұлттық ұланның «Оңтүстік» өңірлік қолбасшылығы.
Камера жазбаларының алдын ала талдауы оқиға кезінде басқа адамдардың әрекеті болмағанын айқындаған. Құқықтық регламентке сай, әскери бөлім мен құзырлы органдар қызметтік тергеп-тексеру жүргізеді; медициналық қорытындыларды жинайды; ӘДК арқылы әскери қызметшінің ары қарайғы қызметке жарамдылығын бағалайды.