20 қазаннан бастап кейбір көліктерді әкелуге тыйым салынады

Қазақстанда 2025 жылдың 20 қазанынан бастап жаңа ережелер күшіне енеді. Енді елге әкелуге рұқсат етілмейтін көлік түрлерінің тізімі өзгереді, деп хабарлайды Azattyq Rýhy. 

Жаңа талаптар нені қамтиды?

Бұл өзгерістер Еуразиялық экономикалық комиссияның (ЕЭК) 23 мамырдағы №45 шешіміне сәйкес қабылданған. Ол «Дөңгелекті көлік құралдарының қауіпсіздігі туралы» техникалық регламентке енгізілген түзетулерге негізделген.

Министрліктің түсіндіруінше, басты өзгеріс «жекелеген көлік құралы» ұғымына қатысты болды. Енді Қазақстан азаматтары жеке пайдалану үшін тек шектеулі санаттағы көліктерді ғана әкеле алады.

Қандай көліктерді әкелуге рұқсат бар?

20 қазаннан бастап қазақстандықтар төмендегі көлік түрлерін ғана шетелден алып кіре алады:

• Жеңіл көліктер (медициналық мақсаттағы арнайы автокөліктерден басқа);
•  Жолсызбен жүретін көліктер – квадроциклдер, сноубайктар, мотовездеходтар (жарыс көліктерінен бөлек);
• Мотоциклдер, мопедтер, мотороллерлер;
• Жеңіл жүк көліктері мен шағын автобустар – жүргізушімен қоса 12 адамға дейін тасымалдауға арналған;
• Жүк көліктері толық салмағы 5 тоннаға дейін (радиоактивті материал тасымалдауға арналған көліктерден басқа).

Ал автобустардың, ауыр жүк көліктерінің және арнайы техниканың кейбір түрлерін әкелуге қатаң тыйым салынады.

Қандай құжат қажет болады?

Көлік құралын елге кіргізу кезінде оның техникалық талаптарға сәйкестігін растайтын құжат – Көлік құралының қауіпсіздік сертификаты міндетті болады. Бұл құжатсыз:

• көлікті кедендік рәсімдеуден өткізу;
• электронды техникалық паспорт алу;
• утилизациялық алымды төлеу;
• мемлекеттік тіркеуден өткізу – мүмкін болмайды.

Сарапшылар не дейді?

Мамандардың айтуынша, бұл талаптар елдегі автопарктің қауіпсіздігін арттыруға; халықаралық стандарттарға сәйкестікті қамтамасыз етуге; сапасыз әрі қауіпті көліктердің әкелінуін шектеуге бағытталған.