Алматы тауларында үсіп қала жаздаған үндістандықтар құтқарылды

Алматы тауларында жоғалып, үсіп қала жаздаған Үндістан азаматтары құтқарылды. Студенттер Космостанция маңында қалып қойған, деп хабарлайды Azattyq Rýhy. 

Құтқару операциясы қалай өтті?

Қазақстанның ТЖМ Республикалық жедел-құтқару жасағы 19 қыркүйекте жедел операция жүргізді. Құтқарушылар 3336 метр биіктікте, Бостандық ауданындағы Космостанция маңында қалған екі шетелдік азаматты аман-есен тауып, төменге түсірді.

2001 және 2003 жылы туған Үндістан азаматтары тауға серуенге шығып, күштерін дұрыс есептемегендіктен, уақытылы қайта орала алмаған.

Студенттердің өзі не дейді?

Құтқарылған шетелдік студенттер қазақстандық құтқарушыларға алғысын білдірді.

«Біз – Үндістаннан келген студенттерміз. Алматы шыңына көтерілдік, бірақ ауа райының қолайсыздығынан уақытында қайта алмадық. Суықта үсіп қала жаздадық. Қазақстанның құтқарушылары бізді қатты аяз бен қатты желден құтқарды. Үлкен рахмет!» – деді олар.

Денсаулық жағдайы

Құтқарушылар жас жігіттерді қалаға жеткізді. Дәрігерлер тексергеннен кейін медициналық көмектің қажеті жоқ екені анықталды.