Жол апаты түскі уақытта болды
Алматыда Назарбаев даңғылында болған жол апатында 20 жастағы қыз жарақат алып, ауруханаға жеткізілді. Көлік жүргізушісі аялдамаға соғылып, металл тіреулер құлаған, деп хабарлайды Azattyq Rýhy.
Полиция департаментінің мәліметінше, жол апаты бүгін сағат 13:45 шамасында Бостандық ауданында болған.
«Daimler Chrysler» автокөлігінің жүргізушісі Назарбаев даңғылымен оңтүстік бағытта келе жатып, рөлге ие бола алмай, алдымен бордюрге, кейін аялдама кешеніне соғылған.
«Осыдан кейін ол жол жиегіне шығып кетіп, аялдама кешеніне соғылды. Металл тіреудің сынықтары 20 жастағы жаяу жүргіншінің денсаулығына зиян келтірді. Қыз қаладағы ауруханалардың біріне жеткізілді», – деп хабарлады полиция.
Апат фактісі бойынша Бостандық аудандық полиция басқармасы тергеу жүргізуде.